Read njo SAYUTSÜNGIR 3 Bible Online

SAYUTSÜNGIR 3 - njo bible

SAYUTSÜNGIR 3

¹Kechisarena asoshi tsüngkhüm ka lir, aser anüng kübok mapa ajak asoshi pei mapang tataktet lir.

²Tasotsü mapang ka, aser tasütsü mapang ka; tatemtsü mapang ka, aser tema aliba atsüdoktsü mapang ka.

³Tepsettsü mapang ka, aser anebtsütsü mapang ka; raksatsü mapang ka, aser yanglutsü mapang ka.

⁴Tajebtsü mapang ka, aser menütsü mapang ka; mangyimtsü mapang ka, aser tsüngsangtsü mapang ka.

⁵Lung mezüdoktsü mapang ka, aser lung nangtentsü mapang ka; abangteptsü mapang ka, aser abangtepba anentsü mapang ka.

⁶Bushiteptsü mapang ka, aser samatsü mapang ka; ayutsü mapang ka aser endoktsü mapang ka.

⁷Shisatsü mapang ka, aser tateptsü mapang ka; ola madoki alitsü mapang ka, aser jembitsü mapang ka.

⁸Meimtsü mapang ka, aser sempatsü mapang ka; rara mapang ka, aser yimjung mapang ka.

⁹Mapa inyaker ka pa belemba nungi tajangzük kechi?

¹⁰Tsüngremi nisung chirtem nem inyaktsü mapa mazüngi alitsü asoshi kechi agütsü aji ni nguogo.

¹¹Pai kechisarena pei mapang nung tobur junga yanglu; ano pai nisung mulung nung tatem maka enoktsü, aji oda saka nisungi tetenzük nungi tatem tashi Tsüngremi inyakba mapaji munguteter.

¹²Ni metet, oda parnok taküm ali tashi pelateptsü aser jangra atemtsüba dang nungi tajungba kecha mali.

¹³Ano nisung shia pei mapa ajak nung chia ajemtsü aser pei mapa tajung ajak jangra atemtsüji Tsüngremi nisung nem agütsüba sempet lir.

¹⁴Ni metet, oda kechisa Tsüngremi inyakdir, aji teti alitsü. Idakji kecha meinoktet mesüra idak nungjagi kecha meindoktet. Nisungi pa dang tsübutsüsa Tsüngremi yamaji renem.

¹⁵Tang alibaji liadokogo, aser koba tarutsü ali, ajia liadokogo, aser koba süiogo, aji Tsüngremi tanaben bushir.

¹⁶Aser ano ni anüng kübok o bendangdakji angu, idakjia tamajung liasü; aser temeshi alidakjia temenen liasü.

¹⁷Ni kü mulung nung ashi, Tsüngremi tamashir aser tamajunger o bendangtsü; kechiaser kechisarena asoshi aser mapa shia asoshi pai mapang ka ataktet.

¹⁸Nisung chirtem atema ni kü mulung nung ashi, oda parnok shirurutem ama dang ta sayutsü asoshi Tsüngremi parnok tendanger.

¹⁹Kechiaser nisung chirtem aser shirurutem tia kasa; ka koda asür yamaji kajia asür. Parnok ajak tangula ka dang; aser shiruru dak alia nisung dak kecha mali; kechiaser ajak amajok lir.

²⁰Ajak tesem kati dang aor; ajak auyi nungi aser ajak tanaben auyi akümer.

²¹Nisung tanela temaleni atur asü mesüra shiruru tanela ali telungleni aor aji shibai metet?

²²Anungji nisungi pei mapa nung pelatsü dak alema tajungba kecha mali ta ni angur, kechiaser aji pa shilem; kechiaser pa sülen kechi ataloktsü aji reprangtsü shibai pa dang sayutet?