Read njo SAYUTSÜNGIR 4 Bible Online

SAYUTSÜNGIR 4 - njo bible

SAYUTSÜNGIR 4

¹Ano tanaben anüng kübok rishikangshi inyakba ajak ni angu aser ajiang, rishikangshiba pur nüktzü, aser parnok tesüneptsür shinga mali! Parnok dang rishikangshir tsütsü tashi liasü, saka parnok tesüneptsür shinga maliasü.

²Ibayongji akümlir shir ano taküm ali, parnok dang nungi asür, shir süadokogo, parnok tia takaba ta ni bilem.

³Hau, anaprongla dang tajungbaji, shiba ano mali, shibai anüng kübok inyakba mapa tamajung mungudang, pa tajungba.

⁴Idangji ni ya angu, oda nisungi pei kiyonger tenük meremba ajanga mapa aser tesangra mapa ajak adoker, ibai amajok aser mopung sülen toktepba ka dang.

⁵Tamashiri pei teka ajetreper aser pei shi achir.

⁶Tebelem aser mopung sülen toktepa teka ana asüngba dang nungi süngjema teka ka sünga aliba tajungba.

⁷Tanaben ni anüng kübok amajok angu,

⁸kijapur shiba pa tatongba mali; saka pa inyakba tatem maka mesüra pa takaba agi pa tenük sünga mali. Shiba asoshi ni anisüngzük makai inyaker ta pai kodanga masüngdanger. Ibaia amajok lir, hau, ibai tesasatsü ka belemba lir.

⁹Ka dang nungi ana tajungba, kechiaser parnoki inyakba asoshi taa tajung kar.

¹⁰Kechiaser parnok alangra, kari pa medemerji mesotsü; saka kija alisang, aiatai, kodang pa alangdir pa mesor shinga mali.

¹¹Ano ana külemi mejangra parnok lemlema lir; saka ka mesüng koda alemtsü?

¹²Aser nisung kati kija alir ka kokaka, ana anema pai majettsü. Lisü asem mesentepbabo yakta metokdanger.

¹³Tambur shisa maka chuba ka, shibai kibok, sayutsüngi o agizüktsü memetet, pa dang nungi sensaker aser shisa taka asangur ka tajungba.

¹⁴Kechiyong yimli nung pa sensaker saka tepuokdak nungi pai chuba menden atong.

¹⁵Anüng kübok akümlir, aser iba asangubajia, shibai chuba melentsü liasü, ajak ni nguogo.

¹⁶Nisung ajak zünger mezüngmai liasü; parnok ajak madak pa liasü. Saka tesülen arurtemi pa dang mepelatsü. Atangji ibaia amajok, aser mopung sülen toktepba dang.