Read njo SAYUTSÜNGIR 5 Bible Online

SAYUTSÜNGIR 5 - njo bible

SAYUTSÜNGIR 5

¹Tsüngremer kidangi aodang na kümdanga jaja-ang; kechiaser shisa makar tenlaba dang nungi angashitsü asoshi anasa ao tajungba; kechiaser parnoki tamajung inyaker ta parnoki memetet.

²Nebang telili, aser Tsüngrem tsüngdang o kazüktsü ne mulungjang teyilung, kechiaser Tsüngrem kotak nung lir aser na alima nung; anungji ne o ishika dang sang.

³Kechiaser mapa jenti nungi pungmang ka adoker, aser o jenti ajanga shisa makar ola adoker.

⁴ Kodang nai Tsüngrem dang tatemzükba ka atemzükdir, aji yakta inyakadokang, kechiaser shisa makar dang pa pela-a mali. Nai atemzükbaji inyakang.

⁵Atemzüker meinyak dang nungibo nai matemzük tajungba.

⁶Nebang agi na menendaktsütsü o tejembi, mesüra nai kotak tenyar dang aibelenogo ta teshi; aji mesüra Tsüngremi ne ola anema rasara, ne teka mapa samatsütsü masü no?

⁷Kechiyong pungmang jenti akümdang, o tazüngla aika adoker; saka nai Tsüngrem tsübuang.

⁸Nai linük ka nung sensaker rishikangshiba ngura, aser ochi o bendangba aser temetenba ambangyim agi bener aoba ngura, idakji tesüngmang; kechiaser tulur ta züngshiba den temaba kati repranga lir, aser ano parnok dang temaba lir.

⁹Saka alima tajangzükji ajak asoshi lir; chubaji alu jagiang mesür.

¹⁰Shibai sen meimer sen agi tenük masüngtsü; shibai rongsen meimer rongseni tenük masüngtsü; ya-a amajok dang lir.

¹¹Kodang oset züindir tachirtema renloker; aser tenük agi reprangba dak alaka, kiburji kechi tajangzük ali?

¹²Tila ka dang chiaka tulu ka chiaka, aluyimer ayip janga mejanger; saka takar moshia akayongbo pa ayip majanger.

¹³Anüng kübok tejashitsü ka ni nguogo, oda rongsen kiburi ayubaji pa timtemtsüang,

¹⁴aser item rongsenji tamajung kar agi samatsür, aser pai tanur ka tebu akümdang, pa teka nung kecha maka.

¹⁵ Tetsü nu menden nungi adok ama, tanaben pa mangsa aotsü, aser pa teka nung bener aotsüsa pai inyakba tajangzük kecha mabentsü.

¹⁶Ya-a tejashitsü tamajung ka lir; koma pa aru yamaji pa aotsü, mopung asoshi belemba nungi kechi ajangzüktsü?

¹⁷Pa arishi piyong pai ammang aser tejashi nung süidaktsüogo, aser pa shisabulu shirangba aser tejashi dang tali.

¹⁸Ajiang, kechi tajung aser tim lir aji ni nguogo; Tsüngremi agütsüba arishi tatsü songtema, anüng kübok pai inyakba nung jangratema chia ajemtsü, kechiaser aji pa tia lir.

¹⁹Nisung shia shiba nem Tsüngremi rongsen aser takaba agütsü, aser aji achitsü tashi agütsü, aser pa tia agizüktsü aser pai inyakba nung tepela angutsü, ibai Tsüngrem sempet lir.

²⁰Kechiaser pai pa arishi anogo aikabo mebilemtettsü, kechiaser Tsüngremi pa mulungjang tepela nung toktsür.