Read njo SAYUTSÜNGIR 7 Bible Online

SAYUTSÜNGIR 7 - njo bible

SAYUTSÜNGIR 7

¹ Tenüng tajungji senti mozü dang tajungba; aser tasünüji tasonü dang tajungba.

²Benjong achiba kidangi aodangbo, mangyimer kidangi ao tajungba; kechiaser nisung ajak tatembang aji lir, aser akümliri pei mulung nung ibai tenoka ayutsü.

³Tejashitsüji menüshishiba dang tajungba; kechiaser tejak ashiba agi temulungjangbo peladaktsür.

⁴Shisa takar temulungjangji mangyimba kidang lir; saka shisa makar temulungjangji lungsolungben kidang lir.

⁵Shisa makar ken anga dangbo, shisa takari arütsüba anga tajungba.

⁶Kechiyong chipo nung ayi arangshiba ola ama, shisa makar menüshishibaji lir; ibaia amajok lir.

⁷Atangji rishikangshiba agi shisa takar tamachi kümdaktsür; aser süpokrem agi temulung chinutsür.

⁸Langka tetenzük dangbo iba tatembangji tajungba, aser taremzük tanelaji asüküm tanela dang tajungba.

⁹ Ain adoktsü teyilung; kechiaser ain adokbaji shisa makar tekubang nung lir,

¹⁰“Tang dang nungi kechiba akhi tajungba?” ta nai tasüngdang; kechiyong iba indangji nai shisa akaba agi asüngdanger masü.

¹¹Senmang den shisa akabaji junger, hau, anü angurtem asoshi ibai tajungba lir.

¹²Kechiaser shisatsüji tekümzükba sen ama lir; saka temetetba tajangzükji kümzükba ama lir, oda shisatsü jagi takümji kümzüka ayur.

¹³Tsüngrem mapaji bilemdangang; oda pai kiraka yangluba shibai metongtet?

¹⁴Yimjiyimjung anogo nung pela-a liang, aser tokrong anogo nung bilemdangang; Tsüngremi kata kata yanglu, oda nisungi pa sülen kechi ataloktsüar mebushitettsüsa.

¹⁵Item ajak ni kü amajok taküm nung nguogo; temeshi nisung ka pei temeshiba nung samar, aser tamajunger nisung ka pei mapa tamajung inyaka arishi atsülanger.

¹⁶Talira temeshi teküm, mesüra ne sasa na alia shisa taka, kechiba nai ne sasa raksatsü?

¹⁷Talira tamajung inyaker teküm, mesüra na tamachi teküm; ne mapang matongdang na kechiba asütsü?

¹⁸Nai ya sota ayu junger; idak nungjagi ne teka techiok, shibai Tsüngrem tsübur item ajak nungi pa jenbutsü.

¹⁹Yimti ka nung yimsüsür ter dang nungi shisa akar asoshi shisatsü jagi tashi tali agütsür.

²⁰Atangji alima nung temeshipuri tajung inyakaka pai temenen mebenshiba nisung kata mali.

²¹Nisungi jembiba o ajak nungbo temulung tagütsü; aji mesüra ne kiliri na atakatemba angashitsü.

²²Kechiaser naia yamaji tangar atakatemogo ta ne mulungjangi metet.

²³Item ajak ni shisa taka agi tendang; ni ashi, “Ni shisa taka asütsü” saka aji ni nungi talangka liasü.

²⁴Kechi lir aji talang nung lir, aser kanga dang tarok; shibai aji bushitettsü?

²⁵Ni metettsü aser bushitsü aser shisatsü bushitsü aser ajak kuli bushitsü, aser külakkübongbaji shisa maka mapa, aser shisa makabaji yiaba, ta bushitsü ni kü mulung agütsü.

²⁶Tetsür shiba mulungjang sang aser zütsük aser la teka talenba lisü ama, laji tasüba dang nungi takuba ta ni angu. Shiri Tsüngrem mulung chidaktsür la nungi jenbutsü; saka temenenpur lai aputsü.

²⁷Ajiang, ni ibai nguogo, ta Sayutsüngir jagi ashir, langka den medemdanga tadokbaji metettsü asoshi,

²⁸kü kolok agi maneni bushi saka ni mangu. Meyirijang rongnung ni tebur ka angu; saka item ajak rongnung tetsür kadanga ni mangu.

²⁹Ajiang, ni ya dang angu, oda Tsüngremi meimchir tindang yanglu saka parnoki aika puratetogo.