Read njo SAYUTSÜNGIR 8 Bible Online

SAYUTSÜNGIR 8 - njo bible

SAYUTSÜNGIR 8

¹Shiba tashitemeteter mesüka lir? Aser shibai teratet shisatettsü? Nisung ka shisatsü agi pa tejak sangwadaktsür, aser pa tejak taretji melenshir.

²Tsüngrem dang nangzükba indang bilema chubai melaba angang.

³Pa madang nungi aotsü teyilung aser tamajung mapa nung arükoshi tesü; kechiyong pa madang mulungba pai inyaker.

⁴Kechiaser chuba o nung ain lir; aser shibai pa dang, “Na kechi inyaker” ta shitet?

⁵Shibai ozüng benshidir tamajung kecha majurutsü, aser shisa akar nisungi lenla aser lenmang meteter.

⁶Kechiaser meimchir timtem tulu liaka, kechisarena nung mapang ka aser o bendangba ka lir.

⁷Kechiaser tesülen kechi ataloktsü pai memetet; kechiyong aji koda ataloktsüar shibai pa dang shitet?

⁸Mopung sota ayutsü nisung shinga daka tashi mali, mesüra tasüba anogo madak pa ain mali. Rara nungi shinga jenbua mali, mesüra pa nem agütsüba tamajung nungi pa madokdaktsütsü.

⁹Ya anüng kübok inyakba mapa ajak nung ni temulung agütsü dang ni nguogo; mapang ka lir kodang nisung kati, pa timtemtsü asoshi tangar ka madak yimsü asür.

¹⁰Iba dakji alaka ni tamajunger ali nung aremba angu, parnok temeshi dak nungi yili adokli ta liasü aser yimti nungji parnoki tamajung inyakba asoshi tenüng asang. Ibaia amajok lir.

¹¹Kechiaser mapa tamajung anema o bendang temerenshi kara meinyak nung, mapa tamajung inyaktsü nisung chirtem mulungjang sashia kümogo.

¹²Temenenpur kati mapa tamajung noklangben inyaka pa arishi langaka, saka ni kanga junga metet oda Tsüngrem tsübubapur shiri pa dang tsübur, parnok jungkem.

¹³Saka tamajungpur asoshi asaktsü, mesüra pa arishi akhüm ka ama matsülangtsü, kechiaser pai Tsüngrem dang metsübur.

¹⁴Alima nung atalokba amajok mapa ka lir. Oda temeshipur nisung dak tamajung inyaker dak ama ataloker, ano tamajunger nisung dak temeshi nisung mapa ama ataloker. Ni ashir, oda ya-a amajok dang.

¹⁵Aser ni tepela agi tenüng asanger, kechiaser anüng kübok nisung ka chia jema pela-a alitsü dang tajungba kecha maka; kechiaser ibaji pa taküm, koba alima nung Tsüngremi agütsü, iba piyongji pa den pa inyakba ajak nung alitsü.

¹⁶Kodang shisatsü metettsü, aser alima nung inyakba mapatem angatettsü asoshi ni temulung agütsü anüngdang aonunga kodanga amua mao,

¹⁷idangji Tsüngrem mapa ajak ni angu, oda anüng kübok inyakba mapaji nisungi bushitettsü makok, kechiaser ibai angatettsü nisungi kodaka merangdir merangaka, pai aji mangutsü, hau, idakji jia shisa akar kati ibai metet ta shiaka pai aji mebushitettsü.