Read njo SAYUTSÜNGIR 9 Bible Online

SAYUTSÜNGIR 9 - njo bible

SAYUTSÜNGIR 9

¹Item ajak kü mulung nung tenoka ayu, item ajak tendanga, oda temeshipur o tashitemeteter aser parnok mapa, Tsüngrem ket nung lir; ya temeim asü tesempa, nisungi memetet; parnok jakdang ajak amajok dang.

²Kechiaser ajak dangi tia kasadang arur, temeshipur dangi aser tamajungpur dangi, tetenlabapur dang aser metenlabapur dang, tajunger koma yamaji tamajungera; azüngashiba pur koma, yamaji züngyazüngku tsübubapur danga tia ka lir.

³Anüng kübok inyakba ajak nung ibai tamajung ka lir, oda ajak dangi tia kasa arur; hau, ano nisung mulung tamajung agi sünga lir, aser parnok alidang tamachi mulungsen parnok mulungjang nung lir, ajiser parnok tasüdaki aor.

⁴Saka akümlir ajak den sentaktepa alisang teimla lir, kechiaser azü taküm kaji molusongzü tasü ka dang taoba.

⁵Kechiaser akümliri parnok asütsü ta metet; saka asüri kecha memetet, aser parnok joko taa kecha maka; kechiyong parnok bilemtetbaji samaogo.

⁶Parnoki meimba, parnoki sempaba, aser nükshiba joko samaogo; aser anüng kübok inyaka aliba nung kecha nunga parnok shilem terakata maka.

⁷Oang, ne chiyungtsü pela-a chiang, aser ne yi tepela mulungsentsü agi jemang, kechiaser Tsüngremi ne mapatem agizükogo.

⁸Ne sobutsü teti mesünga lidakjang, aser ne kolak nung totzü mekongi lidakjang.

⁹Pai anüng kübok ne nem koba kinungtsü agütsü, ne amajok arishi piyong nai meimba kinungtsü den pela-a liang; kechiaser anüng kübok taküm nung aser mapa kongsa nai inyakdir aji ne shilem.

¹⁰Kechisa ne ket agi inyaktsü ajurudir, nai inyakang; kechiaser na aolen asüyim nung mapa mesüra tebilemtsü mesüra temetetba aser shisatsü kecha mali.

¹¹Tanaben anüng kübokji ni angu, oda asemtepbaji tekarar asoshi masü, tongbangji tashi taiter asoshi masü, mesüra chiyungtsü shisa akar asoshi masü, mesüra rongsenji tekolok chirar asoshi masü, mesüra akhüm tsübubaji tesangrar asoshi masü, saka mapang aser tia parnok ajak dak ataloker.

¹²Kechiaser nisungi pa mapanga memetet; ango tekülak zütsük nung apu ama, aser ozü sang nung apu ama, yamaji nisung chirtemji apur.

¹³Ni ano anüng kübok shisatsü tatishitsü ka angu aser aji ni asoshi tulu ka ta reprangtet.

¹⁴Yimti tila nung nisung ishika dang idakji liasü; aser ibaji anema chuba tulu ka aru aser lungbang, aser iba anema mitsa semtu tulu yanglu;

¹⁵yangji sensaker shisa taka ka liasü, aser pai pa shisatsü agi yimtiji kümzük; saka shingaia iba sensakerji mebilemtet.

¹⁶Saka ni shidi, shisatsüji tashi dang tajungba, aji saka sensaker shisa akabaji mezüngmeshir, aser pa o mangashir.

¹⁷Tashitemeteter o tanemi angabaji shisa makartem madak yimsüsüri ayimtenba dang tajungba.

¹⁸Shisatsüji tongbang nung nok o nü dang nungi tajungba, saka temenenpur kati tajung aika samatsür.