Read njo SOLOMON KEN 1 Bible Online

SOLOMON KEN 1 - njo bible

SOLOMON KEN 1

¹Solomon meyong, ken rongnung Ken:

²Aya, pa tebang mesepba agi pai kü dak mesepdaktsünali! Kechiyong yi dang nungi pa temeim tajungba.

³Ne temezüba totzütem tesanem lir, ne tenüng totzü akazükba ama lir. Anungji aiürtemi na meimer.

⁴Ni ne sülen arudakjang, asenoki ilungdi. Chubai ni pa taktangi anir aita lir. Ne dak onoki pelashishia aser pelatepa alitsü. Yi dang nungi onoki ne temeim tali uludaktsütsü. Parnoki atangji agi ni meimer.

⁵Oh, Yirusalem jalatem, Kedar sükitem ama, Solomon teyindangba sü ama, ni tanak, saka tobur tajung lir.

⁶Ni nakrema akümbayong kü dak tereprang. Kechiaser anüi rongloka kü dak apu. Kütsü jabasotemi kü dang ain adoka liasü; parnoki kü nem tsükmenatzü lu nükdaktsü, saka kü tsükmenatzü lubo ni mereprang!

⁷Kü nelai meimba na, kü dang shiangma, ne san telok kong nai chiyungdaktsür, anjongmeshi dang nai aji kong mejangdaktsür. Kechiyong ne medemertem san telok anasa nemzür ka mesüka, kechiba ni alitsü?

⁸Nai memetetra, Oh tetsür rongnung tobur tajungtila, san telok tsüngsü nung anidakang, aser ne san chanutem sannüker sükitem anasa chiyimdakjang.

⁹Kü temeim, Farao talungtsü nung kor lamen ka den ni na medemdanger.

¹⁰Ne tenibung sobutsü agi, ne tekong senti lung agi tobur, jungdakja lir.

¹¹Onoki ne nem hon sobutsü, taribi amenoka yanglutsütsü.

¹²Chuba pei langbang nung alidang, kü teronem totzüi pei tesanem yok.

¹³Kü dang kü meimbaji kü mama tsüngda nung teronem totzü juli ka ama lir.

¹⁴Kü dang kü meimbaji Engedi tsükmenatzü lu nung, henna naro tebenjem tejep ka ama lir.

¹⁵Ajiang, na tobur tajung, kü temeim; ajiang, na tobur tajung; Ne tenük posü ama lir.

¹⁶Ajiang! Na tobur tajung, kü meimba, atangji temeimtsüka; Asen langbang amak amaka lir;

¹⁷Asen ki lenten cedar süng lir, Asen tsüngbangji mitsüktsü süng lir.