Read njo SOLOMON KEN 3 Bible Online

SOLOMON KEN 3 - njo bible

SOLOMON KEN 3

¹Aonung kü yipten nung kü nelai meimba pa ni bushi; ni pa bushi, saka pa mangu.

²Ni tang aramesotsü aser yimti sema, yimdong nung yimdongti lenjem nung senzütsü; kü nelai meimba pa ni bushitsü, ni pa bushi, saka pa mangu.

³Mitkartemi parnok yimti sema aodang ni angu, kü nelai meimba pa nenoki ngurma?

⁴Parnok süia oli-i kü nelai meimba pa ni angu, ni pa dak amet, aser kütsür ki dangi ni pa anir maru tashi, aser ni bena aruba la taktangi anir mait tashi ni pa mechiok.

⁵Oh Yirusalem jalatem, arem nung shio tsüla mesüra mesü lamen tenüng atemer ni nenok dang ashir, pai pela-a maküm tashi nenoki temeim tarimesoma, mesüra tesakdaktsü.

⁶Mokozü telong ka ama, teronem menemba totzü aser liangmesen teronem menemba, ajak bener arem nungi atubaji shiba?

⁷Ajiang, ibai Solomon amenba süngra lir; iba meketa Israel tashi tait nisungtem nungi tashikar nisung roker lir.

⁸Parnok ajak nok semer, rara nung mongyin; aonung aoksaba anema nisung shia pei tepi nung nok semer lir.

⁹Solomon chubai pei sasa, Lebanon süng agi yipten atem.

¹⁰Pai iba tongnü taribi agi yanglu, iba tesülen hon agi, iba menden nakrema meremba agi yanglu. Aji telunglen Yirusalem jalatemi taginütsüka yanglu.

¹¹Apusoa oang, Oh Zion jalatem, aser pa ki ayimba anogo nung, pa mulungjang pelaseta aliba anogo nung, tetsüi pa nem semtsüba chuba korang sema aliba Solomon chuba ajiang.