Read njo SOLOMON KEN 4 Bible Online

SOLOMON KEN 4 - njo bible

SOLOMON KEN 4

¹Ajiang, na tobur tajung, kü temeim; ajiang, na tobur tajung. Ne temeyiba sülen ne tenük guduru mesüka lir. Ne ku Gilead tenem nungi adokba nabong telok ama lir.

²Ne tepu chigudak nungi adokba san telok mejepli ama lir. Parnok shia techanu anana, aser parnok rongnung kata tapung mali,

³Ne tebangmechi angdong temerem ama, aser ne jembishinü azüazür. Ne tenapa ne temeyiba sü kübok jarem jang tepakma mesüka lir.

⁴Ne tekongjibo Dawidi tongbang oset rizüngtsü yangluba lungki, kong jongkok temeranger nisungtem jong ajak itaka ayu, ibaji mesüka lir.

⁵Ne mama anaji, labu naro rongnung chiyimba mesü lamen ana jakrep mesüka lir.

⁶Anogo mokonga, aser akhüm jena mao tashi, teronem menemba liangmesen aliba tenemi, aser teronem aliba ungsemi ni ilungdi.

⁷Na tobur tajung, kü temeim; ne dak kecha tajitettsü maket.

⁸Kü den Lebanon nungi arung, kü kiyimla, kü den Lebanon nungi; Amana kolak nungi, Senir aser Hermon kolak nungi, molusongzü lungki nungi, merok keyi tenem nungi arung.

⁹Nai kü mulungjang tasü itdaktsü tenüla, kü kiyimla; ne tenük ken rangloktsüba agi, ne tekong ken meyipba agi nai kü mulungjang tasü itdaktsü.

¹⁰Ne temeim koda tajung, tenüla, kü kiyimla! Yi dang nungi ne temeim kodaka tajungba! Aser teronem tapu ajak dang nungi ne totzü sanem kodaka tajungba!

¹¹Oh, kü kiyimla, ne bang nungi ninang mojitzüjeb ama mojitzü tsüker. Ninang mojitzü aser mamatzü ne meli nung keta lir; aser ne süoshi tesanemji Lebanon sanem ama lir.

¹²Tenüla, kü kiyimla, shibanga aliba atsüki ka lir, noktangadokba tzübu ka, nembangadokba tzüpokdak.

¹³Ne dak adokbatem jarem süngjang tsüki, süngjang-lijang tajung; Henna teronem menemtsü süngdongtem,

¹⁴Teronem menemtsü aser saffron, kalamus aser süngshidong, liang süngdong ajak; teronem menemtsü aser aloe, tongtibang teronem ajak.

¹⁵Ai tsüki tzüpokdak ka, takümtzü tzü tzübu ka, aser Lebanon nungi ayimba ayongtem lir.

¹⁶Sakang, Oh anüdoklentip mopung; aser arung, na anüolentip; kü atsüki madak, iba teronem adokdaktsütsü oangma. Kü meimba par atsüki-i arudakjang, aser pa süngjang tajung chidakjang.