Read njo SOLOMON KEN 5 Bible Online

SOLOMON KEN 5 - njo bible

SOLOMON KEN 5

¹Ni kü atsüi arua lir, tenüla, aser kü kiyimla. Ni kü teronem menemba aser teronem tajung bendenogo. Kü ninang mojitzü kü ninang mojitzü tejeb den ni chiogo. Kü mamatzü dena ni kü yi ni ajemer, chiang, Oh tembartem, aser jemang; jemshia jemang, Oh temeimtepertem!

²Ni mejang, saka kü mulungjangbo saka liasü. Angang! Kü meimsangi akoshidagi. Kü nem lapokjang, tenüla, kü meim, kü guduru, kü tabensala. Kechiyong azüngtzü agi kü kolak tayi lir. Kü ku aonung tzüsü jenzüka tsükba agi tayi lir.

³Kü süoshi ni semzükogo; ni aji koda asemtsü? Ni kü tsüng shitokogo; ni koda itemji menentsü?

⁴Kü meimbai pa ket kishipok nung amuok, aser kü mulungjang kü telunglen yongyaseta ali.

⁵Kü meimba nem lapoktsütsü ni shishi, aser kü teka teronem menemtsü agi jenzüka, kü temeyongtem teronem tzü agi kirürtsü manung jenlok.

⁶Kü meimba nem ni lapoktsü, saka kü meimbabo meyipa or liasü. Pai jembidang kü nela lula-adok. Ni pa bushi, saka pa mangu; ni pa aja, saka pai matang.

⁷Mitkartem, parnok yimti sema aortemi ni angu. Parnoki kü dak azük, parnoki ni yirutsü. Jara anükertemi kü süoshi bener oadok.

⁸Oh Yirusalem jalatem, ni nenok dang melar, nenoki kü meimba ngurabang, nenoki pa dang ni temeim agi shiranger ta shiang,

⁹Oh tetsür rongnung tobur tajungtila, nai onok dang yamai melatsüsa, ne meimba tangar temeimba dang nungi kechi taoba aka?

¹⁰Kü meimbabo meyi ter rongnung balaka, yamuka aser sentsü songshia lir.

¹¹Pa kolak tajungtiba hon lir. Pa ku waro ka amai tanak, semshia keta lir.

¹²Pa tenüktem ayong anasa gudurutem mesüka, mamatzü agi chigur petpeta amenoka lir.

¹³Pa tenibung tesanem adokba naro ama lir; pa tebangmechitem labu narotem ama, teronem menemtsü jenzükba ama lir.

¹⁴Pa tekatem berem senti lung amenokba hon küri ama lir. Pa temang sapfir senti lung amenokba shidi pu agi yangluba ama lir.

¹⁵Pa tetsüngtem tongbang lung tongshi hon tajung tesepokdak settok ama lir. Pa tereprangtsü Lebanon mesüka, cedar süngdong ama tajung lir.

¹⁶Pa tebang agi azü azür; hau, pa ajaklen tepuatsüka. Ibai kü meimba lir, aser ibai kü tembar lir, Oh Yirusalem jalatem.