Read njo SOLOMON KEN 7 Bible Online

SOLOMON KEN 7 - njo bible

SOLOMON KEN 7

¹Oh Chuba jala, tsüngsem semer, ne tsüng koda tobur tajung! Ne tepi teloktep senti lung ama tetangshir teka mapa ama lir.

²Ne tebela temeyoktep yi agi anünga maliba, marok tenari ka mesük. Ne tepok, labu naro agi meketa aliba, tsük nangtenba ka mesüka lir.

³Ne mama anaji, mesü lameni jakrep mepuba mesüka lir.

⁴Ne tekong shidi pu mitsa mesüka; ne tenük Heshbon nung, Bath-rabbim anasa tzübu amaji lir. Ne teni Damaska tsütsü shia aliba Lebanon mitsa ka mesük.

⁵Ne dak ne kolakji Karmel tenem mesük, aser ne kolak nung ne ku nakrema meremba sentsü mesük; iba ku tekirak nungji chubaji pua lir.

⁶Na koda tobur ajung aser koda jangratemtsü, Oh temeimla, temulung pelatsü asoshi!

⁷Ibai ne sorubangru asangdong mesüka lir, aser ne mama tsükmenatzü tejeb mesüka lir,

⁸Ni ashi, Ni asangdong jagi atutsü ni iba kongsang nung sottsü. Ne mamaji tsükmenatzü tejep ama, aser ne tangula menembaji metoklashi mesüka sangma;

⁹Ne tebang mesepbaji yi tajungtiba mesüka, koba meilungi oa aneb aneba, tebangmechi aser tepu manung air. Mesepa nanga kü bangi yimoka aiba mesük.

¹⁰Ni kü meimba meyong lir, aser pa tejangraba kü tsütsü lir.

¹¹Arung, kü meimba, asenok moapu jagi odi; aser asenok yimtak mungdi.

¹²Yakta saker tsükmenatzü lu jagi asenoki odi. Tsükmenatzü mechizüka ali mali, aser pa teben punga ali mali; aser jarem naro punga ali mali asenoki reprangdi. Yangji ni kü temeim ne nem agütsüdi.

¹³Mandrake narotemi tesanem yoker, aser ozü kishi züngdang süngjanglijang tapu ajak tasen aser tejen, ni na asoshi yuja lir, Oh kü meimba.