Read njo SOLOMON KEN 8 Bible Online

SOLOMON KEN 8 - njo bible

SOLOMON KEN 8

¹Oh Naji kütsü mama ayongba künu ama lilasang! Ni na kimalen angudang, ni ne dang tebang mesepla; Hau, aser shingaia ni matalatsüi lila.

²Ni na anir ola aser na kütsür kidangi bener arula. Lai ni sayutsüngila. Ni ne nem kü jarem süngjang teronem yi jemdaktsüla.

³Pa tabelen teka kü kolak kübok alitsü, aser pa tajichi tekai kü dak azüittsü.

⁴Oh Yirusalem jalatem, ni nenok dang melar. Nenoki pa pela-a maküm tashi temeim tarimeso, mesüra tesakdaktsü.

⁵Pai meimba dak metaloker arem nungi adokba ya shiba? Metoklashi süngdong kübok ni na sakdaktsü. Yangji netsü na asotsü kangshia liasü. Yangji shibai na aso, la nusotsü kangshia liasü.

⁶Ne mulungjang nung tajenba ka ama, ne tepen nung tajenba ka ama nai ni yuang. Kechiyong tasüba ama temeim tashi tait lir. Tenükmeremji lep ama taochi maka; iba yaloktsübaji mi nungi yaloktsüba, KIBUBA milak tesashi adokba lir.

⁷Tzü jenti agia temeim meremseptet, mesüra tzümetsüng agi aji metsüngbangtsü makok. Nisung kati temeim asoshi pei kidang rongsen ajak agütsüra, pa khenyongi sensatsütsü.

⁸Ozü tenu tenüla ka lir, aser la dak mama maket. Lai ani asüngba anogo nung onoki tenüla asoshi kechi inyaktsü?

⁹La jara ka asübo, onoki la manung taribi mitsa yangerloktsü; aser la kishi ka asübo onoki cedar süng süngtsük agi angenbangla.

¹⁰Ni jara ka, aser kü mama iba mitsatem mesüka lir. Idangji pa nükdang ni tesünep angur ka ama liasü.

¹¹Baal-hamon nung Solomon tsükmenatzü lu ka liasü. Tanükertem nem pai tsükmenatzü luji agütsü. Nisung shiai süngjang asoshiji taribi sen meyi ka ka bener arutsü liasü.

¹²Kü tsükmenatzü lu, koba kü meyong lir, kü kisüng meyong lir. Na, Oh, Solomon, meyirijangi agitsü akok, aser shirnoki süngjang anüker itemji noklang ana agitsü.

¹³Na atsüki nung alisang, medemertemi ne ola angashir; aji kü nem angashidakjang.

¹⁴Kara-ang, kü meimba, aser teronem aliba tenem manung na mesü tsüla ka mesüra shio chanu ka ama liang.