Read njo ISAIA 1 Bible Online

ISAIA 1 - njo bible

ISAIA 1

¹ Yihuda chubatem Uzzia, Yotham, Ahaz aser Hezekia tendak Amoz jabaso Isaia mangdang, koba pai Yihuda aser Yirusalem indang angu.

²“Angang, Oh anüngtem, tenarong agüjang, Oh alima; kechiyong KIBUBAi jembiogo; ni techirtem mesütet aser intetdaktsü, saka parnoki ni anema apuso.

³Nashi pungchi-i pei kibur metet, aser gadoi pei kibur ki metet; saka Israelibo memetet, kü nüburi mangateter.”

⁴Aia! Temenen kin, menen khu bener aliba nübur temenen mapa inyaker metsü, teraksa benshiba techirtem! Parnoki KIBUBA sentoka toktsüogo, parnoki Israel nunger Temeshisang sensatsüogo, parnok temulung pila-a tesüleni atsüngzükogo.

⁵Nenok dak azüktsüsa ano kechiba nenoki tali tali anema apusotsü? Tekolak ajonga menür, aser temulungjang ajak lular.

⁶Tetsüng temupu telunglen nungi tekolak tashi anema mali; zübutem, mena atepba, aser azü ayimba komo dang; itemji menembang, mesüra talepa malep, aser totzü agi aneba mekümdaktsü.

⁷Nenok lima azüngmeyaka lir, nenok yimtitem mi agi ronga lir; nenok lima, nenok tsüngdang bendangertemi meyokadoker, aser bendangertemi atsüngdokba ama aji azüngmeyaka lir.

⁸Aser tsükmenatzü lu nung sempak ki ama, züngi tsüki nung semtu ama, lungbanga aliba yimti ama, Zion jala tokja lir.

⁹ Temeranger KIBUBAi asenok asoshi ishikadanga anünga metoktsü asübo, asenok Sodom ama kümer lila, asenok Gomora ama kümer lila.

¹⁰KIBUBA O angang, nenok Sodom yimsüsürtem, KIBUBAi sayuba o nung tenarong agüjang, nenok Gomora nisungtem.

¹¹ “Tetepsetba tenla paikati ni atema kechi?” ta KIBUBAi ashir. “San tepung aser tejebketba shiruru temo agi tarongba tenla agütsütsü ni jenti kar; saka nashi pungchi, san chanu mesüra nabong tepung zü nung ni mepelar.”

¹²“Nenoki kü madangi arudang, kü kilempok nung ajemshitsü, ibai nenok nungi shibai akang?

¹³Joko amajok tenla teben, teronem menemtsü ni asoshi tesempatsü lir; ita tasen aser amungnü, mungdang jatepba nenok temenen mungdangji ni ajia melitet.

¹⁴Nenok ita tasen aser benjongbentsü kü nelai sempar; ni asoshi itemji timtemtsü lir, item jagi ni alaker.

¹⁵Anungji, kodang nenok teka songtokdir, ni kü tenük nenok nungi miimadoktsü; nenoki aiben sarasademaka, ni mangashitsü; nenok teka azü agi sünga lir.

¹⁶Nenok shitokang, nenok merüka liang; kü nükdang nungi nenok temenen inyakaba endokang; tamajung inyakba anenang;

¹⁷tajung inyaktsü angazükang; ochi benshiang, rishikangshir noktangang, tebu malir o bendangjang, amitsürtem temeten asoshi noktakang.”

¹⁸“Tang arung, aser asenoki külemi shisadangdi,” ta KIBUBAi ashir, nenok temenen jakjaa meremaka, itemji rürjeb ama mesüngtsü; azü ama meremaka, itemji kümpa temesüng ama akümtsü.

¹⁹Nenoki hai-haura kaa aser tashi angara nenoki linük nungi tajung achitsü;

²⁰saka nenoki ma ta anema apusora, nok agi nenok meyoktsü; kechiyong KIBUBA tebang agi aji jembiogo.

²¹Tamang katetba yimtito kodaser nüktapangtatsür aküm! La dak ochi aser temeshiba agi sünga liasü, saka tangbo nisung tepseter kümogo.

²²Ne taribi yinsü küma lir, ne yi tzü den meyoktepa lir.

²³Ne yimsüsürtemji anema apusortem kümogo aser auürtem medemer kümogo; nisung shiai süpokrem meimer, aser tajangzük sülen anidaker; parnoki tebu malir mekümzüker mesüra parnok dangi aruba amitsür asoshi ochi mapa meinyaker.

²⁴Anungji Temeranger KIBUBA, Israel Takoksang, KIBUBAi ashir, “Ni kü temerirtem madak tejashi sünemtsü aser ni kü tsükchirtem dak mang ayangtsü.

²⁵Ni na anema kü teka meyiptsü; aser ne yinsü misem nung yimsa-a yoktsü, aser ne temeyoktepba ajak meshitettsü, aser ne yin ajak bener aotsü.

²⁶Mezüng amato ni ne obendangertem aser tetenzükdang ama ne teshisadanger tamarenertem yanglushitsütsü; iba sülen ne dang temulung alemba, temeshi yimti ta ajatsü.”

²⁷Ochi agi Zion alangzüktsü, aser la temulung meyipertem temeshiba agi kümzüktsü.

²⁸Saka ozüng raksartem aser temenenpur asoshi külemi tesamatsü alitsü, aser shirnoki KIBUBA senzüka yutsü parnokji samatsü.

²⁹Kechiyong nenoki jangraba sülemdong asoshi nenoki aktsü, aser nenoki shimtetba atsüki asoshi nenoki pangka-a alitsü.

³⁰Kechiyong to ajetba sülemdong ama, aser tzü makaba atsüki ama nenok alitsü.

³¹Tashi tait nisung tatsüktsü süng ama, aser pa mapa misem ama alitsü; aser anaprong külemi arongtsü, aser aji shingaia meremseptettsü