Read njo ISAIA 11 Bible Online

ISAIA 11 - njo bible

ISAIA 11

¹Yesse tongben nungi lapi ka adoktsü, aser pa tera nungi kongsang kati tejang atangtsü.

²Aser pa madak KIBUBA tanela, shisatsü aser tangatetba akaba tanela, teshisadangba aser tashi akaba tanela, aser temetetba tanela, aser KIBUBA tsübuba alitsü.

³KIBUBA tsübuba nung pa pelaba alitsü; pa tenük agi anguba agi pai o mebendangtsü, aser pa tenarong agi angashiba agi pai melemtettsü;

⁴ Saka ochi agi pai sensaker o bendangtsü, aser linük nung ajemalur asoshi timi lemtettsü; aser pa tebang ajok agi pai alima dak azüktsü, aser pa tebang mechi tangula agi pai tamajunger tepsettsü.

⁵ Pa teperem nangri temeshiba alitsü, aser pa peremlen temulung alemba asütsü.

⁶ Idangji tzünüi san chanu den alitsü, aser merok keyi-i nabong chanu den mepitaka alitsü; nashi chanu aser molusongzü chanu aser tejebketba külemi chiyimtsü, aser tanur chanu kati parnok anishitsü.

⁷Nashi aser shirem külemi chiyimtsü, aser parnok techanutem külemi mejangtsü, aser molusongzüi nashi pungchi ama monü achitsü.

⁸Aser mama ayongba tanuri per lungki nung asayatsü, aser mamadokba tanuri pei teka agi per tesep nung amushitsü.

⁹ Kü temeshi tenem ajak nung parnoki kecha mashitsü mesüra mesamadaktsütsü; kechiyong tzü agi tzüyim nembanga ali ama, KIBUBA metetba shisatsü agi alijak asüngtsü.

¹⁰ Iba anogo nungji ya ataloktsü, oda Yesse tera koba nisungtem asoshi temaitsü lir, kintemi pa dangi bushia aotsü, aser pa anisüngzükdakji sentsüwangshi alitsü.

¹¹Iba anogo nung, Asiria, Ijip, Pathros, Kus, Elam, Shinar, Hamat aser tzüyim tzüküm linük nungi; KIBUBAi pei teka agi tanaben tanüngba pei nübur koba anünga lidir aji bena arutsü.

¹²Kintem nem pei temaitsü agütsütsü, aser jentoka aliba Israel senteptsü, aser alima kinük pezüsülen nungi Yihuda prokshia aliba külemi senteptsü.

¹³Idangji Efraim anema tenük meremba joko anentsü, aser shirnok Yihuda anemer küma lir, parnok leptoktsütsü; Efraimi Yihuda dak tenük memeremtsü, aser Yihudai Efraim anemer masütsü.

¹⁴Saka parnoki anüolen Filistia nunger tapubang manung yima alutsü, parnoki külemi anüdoklen aliba chirtem rakzükraktemtsü, Edom aser Moab parnok tashi kübok lidaktsütsü, aser Ammon chirtemi parnok dang tashi angatsü.

¹⁵ Idangji KIBUBAi Ijip tzüyim temeli kongdaktsütsü; aser pai mopung tatsük agi ayong madak pa teka arakzütsü, aser aji ayong tila tenet küma zükshitsü, aser nisungtem tsüngsem takong agi jaja-a odaktsütsü.

¹⁶Aser tanüngba pei nübur koba anüngdir, parnok asoshi, Israel atema par Ijip linük nungi adokba anogo nung aliba ama, Asiria nungi lentongbang ka alitsü.