Read njo ISAIA 13 Bible Online

ISAIA 13 - njo bible

ISAIA 13

¹ Amoz jabaso Isaiai Babilon indang khuret anguba:

²Nenoki tenem moapu manung temaitsü ka yuang; parnok dang ola tulu agi ja-ang, aser tamarenertem süngkhümbongi parnok aitsü teka agi ayipang!

³Kechiyong kü ain adokba inyaktsü asoshi bendanga agütsüba kü pur dang ni melaogo. Hau, kü temerangertem, aser tejak tenteta pelatepba kü pur ni jaogo.

⁴Nisung telok tulu ola mesüka tenem nung nanüngtepba angang! Kintem chuba yimli adenshia nanüng adokba angang! Temeranger Telok KIBUBAi tongbang asoshi temerangertem atenshidaktsür.

⁵Alima talang, nüngjang tatem nungi parnok arudagi, alima ajonga samatsütsü, KIBUBA aser pa ain adokba nok o nü lir.

⁶Nenoki mang yimang, kechiyong KIBUBA anogo anasa lir, aser ajak Takoksang nungi tesamatsü arutsü.

⁷Anungji teka ajak tashi maiti akümtsü, aser nisung shia temulung makai akümtsü,

⁸aser parnok akseta alitsü, temulung zürep aser tejashi agi parnok dak atongtsü, tetsür nusodang kangshi ama parnok tekangshi nung alitsü; parnok kati ka dak tesüngmang agi rangshia reprangteptsü, parnok tejakji milak ama alitsü.

⁹Ajiang! Alima azüngazünga yutsütsü, aser iba nungi temenenpur samatsütsü, taochi maka, terasaba aser tesashi ain adokba agi, KIBUBA anogo arur.

¹⁰ Kechiyong anüng petinutem aser telong tena aliba, petinutemi pei tesangwa magütsütsü; kodang anü adokdir, pa tammang akümtsü, aser itai pei tesangwa mayatsü.

¹¹Iba lima temenen asoshi ni merenshitsü, aser nisung tamajunger parnok tai menaba asoshi ni merenshitsü; asükümer jaksajaklemba ni anendaktsütsü, aser ambangyimer mezümekümba teküboklen aludaktsütsü.

¹²Hon tajung dang nungi nisung ang, aser Ofir hon dang nungi meimchir ang angutsü tasakba ni kümdaktsütsü.

¹³Anungji Temeranger Telok KIBUBA terasaba ajanga, pa tesashi ain adokba anogo nung anüngtem atententsü, aser alima pei talidak nungi anokshitsütsü.

¹⁴Ajiser tarishiba mesü mesüka, mesüra san telok tanitener maliba telok mesüka, parnok nisung shia pei nübur dangi meyipa aotsü, aser nisung shia pei limai ajentsü.

¹⁵Shir ngudir ajak ateta atsüngtsü, aser pua aruba nisung shia nok agi lepsettsü.

¹⁶Parnok kinü chanutem parnok nükdang anükanüka akusatsütsü, parnok ki rakzükraktemtsü, aser parnok kinungtsürtem dak sotaktsü.

¹⁷Ajiang! Ni parnok anema, taribi asoshi mebilemba aser hon nung tepela manguba Mede nunger ajungmesotsü,

¹⁸Parnok lijakjang agi asangurtem anüka kasatsütsü, aser nu menden süngjang madak parnoki taochi makatsü, mesüra tanurtem madak parnoki aochia mereprangtsü.

¹⁹Tsüngremi Sodom aser Gomora samatsüdang amato, chuba yimli tobur tajung Kaldia nunger asüküm, sentsüwangshiba Babilon, yamaji akümtsü.

²⁰Ajagi shinga marutsü mesüra putusa putu malitsü, Arab nunger shingai yangji süki meyanglutsü, sannüker shingai yangji san meyipdaktsütsü.

²¹ Saka lisem lima arem shirurutem yangji mejangtsü, aser kitemji asatepa aliba shirurutem agi sünga alitsü; yangji ostrich ozütem alitsü, aser shio tepungi yangji tsüngsangtsü.

²²Parnok lung ki nung tzünüi aser chuba ki tajung nung shirongtem asateptsü; iba mapangji tatonger, aser iba anogoji matsülangtsü.