Read njo ISAIA 14 Bible Online

ISAIA 14 - njo bible

ISAIA 14

¹Kechiyong KIBUBAi Yakob dak yimlibilem akatsü, aser ano Israel shimtettsü, aser parnok pei lima nung yutsütsü; aser bendangertemi parnok den semloka alitsü, aser parnoki Yakob kidong yima alitsü,

²Aser kintemi parnok anir parnok alidaki arutsü; aser Israel kidongi parnok KIBUBAr linük nung tenzükertem aser tenzüklatem kümdaktsütsü parnok agitsü, yamaji parnok mezüng apurtem parnok kübok tepuokertem kümdaktsütsü, aser parnoki parnok kangshitsüba pur madak yimsü asütsü.

³Ne tejashi aser ne timtem nungi, aser mapa tasak koba agi na inyakdaktsütsü kümdaktsü,

⁴Babilon chuba anema iba ajumechiba ken ya nai bena arung aser shiang, rishikangshirto koda anenadok! Mezümekümerto anenadok!

⁵KIBUBAi tamajunger ajok, aser yimsüsürtem nisung raksatsü,

⁶Koba agi nisungtem dak teraksaba agi maneni azük, aser shingaia menoktangtetba tekangshiba agi ain adokba nung kintem madak yimsü asü.

⁷Alima rangben anisüngzük lir, aser ajemajema lir, parnoki ken atener.

⁸Hau, fir süngdongi ne dak pelar, aser Lebanon nung cedar süngdongtemi ashir, “Na laoa ali nungji, onok anema süng alener shinga marur.”

⁹Teküboklen nungi Sheoli ne den ajuruteptsü arakzür, aser kodang na arudir na ajurutsü, oda alima tongtipur ajak na aruba ajanga aka asodaktsür; shirnok alima nung chubatem liasü, ajak chuba menden nungi nokdaktaktsür.

¹⁰Parnok ajaki jembia ne dang ashitsü, “Onok ama ano na tashi mait kümogo na? Na onok ama kümogo na?”

¹¹ Ne kongki ola aser ne jaksajaklemba Sheol tonga anizükogo; na telunglen metsük agi kubanga lir, mesen agi na nembanga lir.

¹² Kotak nungi na koda tsüka lir, Oh anüngdang petinu, anepdang chir! Kintem teküboklen ayusang, koda na ali tonga lepzüka yoka lir!

¹³ Nai ne mulungjang nung ashi, “Ni kotaki atutsü, Tsüngrem petinutem temalen ni kü chuba menden ajungkettsü, aser anüolentip tatembang nung ni telok sentepba tenem manung amentsü.

¹⁴Ni mepet temaleni atutsü, ni tematiba mesüka alitsü”.

¹⁵Saka kangla tatembang tonga, Sheol tashi nabo anir alutsü.

¹⁶ Shirnoki na angur parnoki sashia ne dak reprangtsü, parnoki ne indang shisadanga ashitsü, “Alima atentendaktsüba, aser chuba yimlitem anokshidaktsüba;

¹⁷Alima arem kümdaktsüba, tepuokertem pei kidangi mechiokba nisungto ibai no?”

¹⁸Kintem madak chuba ajak, parnok nisung shia pei leper nung sentsüwangshia mejanger;

¹⁹saka nabo tesempatsü kongsang ka ama, nok agi tepsetba pur, tasürtem den, tetsüng kübok ajemshiba tasümang, kanglai aluba ama na leper nung jentok.

²⁰Na parnok den medema maremtsü, kechiaser nai ne linük raksatsü, nai ne nübur tepset, tamajung inyaker kin tenüng teti asoshi metetshitsü.

²¹Parnok tebutem tai menaba atema parnok chirtem adoka, alima aika, alima rangben yimlitem agi mesüngdaktsütsü asoshi nenoki pa chirtem tepsetdak renemang!

²²“Ni parnok anema apusotsü, ta Temeranger Telok KIBUBAi ashir, aser Babilon nungi tenüng aser tanüngba, techir aser semchisemnur lepdokadoktsü, ta KIBUBAi ashir.

²³Ano ni ibai jepju alidak aser tzü moti kümdaktsütsü aser aji ni tesamatsüba kioktsü agi okdoktsü” ta Temeranger Telok KIBUBAi ashir.

²⁴ Temeranger Telok KIBUBAi azüngashia ashi, “Kü sentong ama, aji oda ataloktsü, aser ni mulungtetba ama, aji yamaji alitsü.

²⁵Oda ni Asiria nunger kü ket agi raksatsütsü, aser kü tenem manung tetsüng kübok pa ajemshitsü, idangji pa süngra parnok nungi pila-a aotsü, aser parnok tapubang nungi parnok khu pilatsü.

²⁶Alima ajonga asoshi ibai kü teinyaktsü mulungtetba sentong lir, aser kin ajak madak mekangba tekaji ibai lir.

²⁷Kechiyong Temeranger Telok KIBUBAi inyaktsü mulungtetogo, aser aji shibai raksatettsü? Pa ket songtoka lir, aji shibai meyipa songtemtsü?”

²⁸ Ahaz chuba asüba küm iba shin o aru:

²⁹Oh Filistia, nenok dak azükba ajok raksaogo, nenok ajak tepelatep, kechiyong per tera nungi ongyang per ka adoktsü, aser pa süngjangji mi ama yima aoba per asütsü.

³⁰Sensaker mezüng asoba chiyungtsü angutsü, aser tanünger lendong makai ontaka alitsü, saka ne terabo ni ayawara agi tepsettsü, aser ne tanüngba ni tepsettsü.

³¹Jeptepang, Oh süngkhüm; ayimtenang, Oh, yimti; na yimsa-a ogo, Oh Filistia, nenok ajak; kechiyong anüolentip nungi mokozü ka arur, aser pa temeshitet mapang nung shinga atsüngzüka menoktaker.

³²Ajangla kin osang abeneri kechi telangzüba agütsütsü? Oda KIBUBAi Zion yangluogo aser pa dak par timtemba nübur jenoktsü.