Read njo ISAIA 15 Bible Online

ISAIA 15 - njo bible

ISAIA 15

¹ Moab asoshi shin o: Kechiaser konungyongi Ar aser Kir yimtitem raksatsüogo; aser Moab ola madokteti lir.

²Tekülemdak tenem nung ajebtsü asoshi Dibon tuogo, Nebo aser Medeba asoshi Moab nisungtemi ajeber, tejashi agi parnok kolak aser bangsemo südokogo.

³Parnoki yimdong nung pei sasa anemsü agi nangri kanger kilem manung, aser yimdong moapu nung nisung shia nüktzü yima ajeber.

⁴Heshbon aser Elealei ayimten, aser parnok ola Yahaz tashi angashir, anungji Moab nok o nü abenertemi ola tulu ayimten aser pa tanela atentener.

⁵Kü mulungjangi Moab asoshi ajeber, par tamarenertemi Zoar aser Eglathshelishiya leni ajener; parnoki jeba Luhiti atur, kechiyong Horonaim lenmang nung parnoki tesamaba ola agi ayimtener.

⁶Nimrim tzü menendoka lir; kechiyong ai konga lir; rem lanu madoker, yangji oset tajem kecha maka.

⁷Anungji parnoki jenti ajangzükba, aser parnoki rizüngba, willow dong aliba ayong leni parnoki bener aotsü,

⁸Kechiyong ayimtenba ola Moab arrtsü tashi ogo, iba jeptepba ola agi Eglaim, aser iba jeptepba ola agi Beerelim atong.

⁹Kechiyong Dimon tzütem azü agi sünga lir, kechiyong Dimon madak, Moab nungi jentetbatem madak aser linük tanüngba dangi, ni ano molusongzü ka bener arutsü.