Read njo ISAIA 16 Bible Online

ISAIA 16 - njo bible

ISAIA 16

¹ Sela koba arem tsütsü lir, iba nungi linük yimsüsürtem asoshi, Zion jala tenem dangi san chanutem yokang.

²Kechiyong nemzüa aliba ozütem ama, prokshia aliba ozü tesep ama, Moab jalatema Arnon ayong tzütendak alitsü.

³“Shisatsü agüjang, ochiba agüjang; ne akhüm aonung ama anjongmeshi kümdakjang! Tejendokba pur atsükokjang, aser tejendokertem tekülakoktsüma.

⁴Moab nung aridoka alirtem nenok rongnung lidakjang; teraksatsür tejak nungi parnok asoshi tejenokdak sang! Kodang rishikangshir tatem kümdaktsüdir, teraksatsür anendaktsüdir, aser ajemzüka yoksang linük nungi makai samatsüdir;

⁵taochi nung chuba menden ka yanglutsü, aser iba manung, Dawid süki nung ochi nung nisung kati amentsü; ochi obendang bushiba aser kechi shitak, aji inyaktsü jangraba yimsüsür ka adoktsü.

⁶Moab mezümekümba indang, pa kanga asüküm ta onoki angashiogo, oda pa ngasangatem aser pa asükümba, aser pa teraksaba, pa jaksajaklema jembiba tazüngla lir.

⁷Anungji Moabi mang yimdakjang, nisung shiai Moab asoshi jebdakjang; Kir Heres nung tsükmenatzü takong agi yangluba amtsük asoshi parnoki jepdakjang.

⁸Kechiyong Heshbon alu, aser Sibma tsükmenatzü kongadoker; kintem kiburtemi iba kongsangtemji leptoktsüogo; koba agi Yazer tashi atong, Lisem lima tashi nemzüa ao, iba kongsangtem bendanglen aser tzüyim atena sangshia ao.

⁹Anungji Sibma tsükmenatzü asoshi ni Yazer den ajebtsü. Oh Heshbon aser Eleale, ni na kü nüktzü agi tenlatsütsü; kechiyong ne mei süngjang madak, aser ne aluruba madak arür ola sangoktsüogo.

¹⁰Aser tejang tangtsüdak moapu nungi temulung achiba aser tepela samadokogo; tsükmenatzü lu nung ken atenba mesüra pelatepba ola malitsü; temenüngdak tsükmenatzü tzü shingaia majemzüktsü, tsükmenatzü lu nung pelatepba asatepba ni anendaktsüogo.

¹¹Aji asünung Moab asoshi kü nelai kongki ama anünger, kü mulungjang Kirheres asoshi anünger.

¹²Moabi pei tenemi pei sasa belemseta adokaka, mesüra temeshidaki sarasademtsü iaka, pa kecha makümtsü.”

¹³Moab indang akhidang KIBUBAi jembiba ya lir.

¹⁴Saka tang KIBUBAi jembia ashir, “Küm asem tsüngda nung, ayanger ka küm amato, Moab sentsüwangshi pa telok tulu den maksütsü kümdaktsütsü, aser tanüngba rogoji kanga ishika aser tashi mait alitsü.”