Read njo ISAIA 19 Bible Online

ISAIA 19 - njo bible

ISAIA 19

¹ Ijip indang shin o: Ajiang, KIBUBA mepet tekara manung mener Ijip dangi arur; pa tsüngdang Ijip süngyanglutem atententsü, aser Ijip mulungjang pei dak yimsa-a aotsü.

²Ni Ijip nungeri Ijip nunger anema ajungmesotsü, aser parnok nisung shia pei adianu anema, pei kinunger anema, yimti-i yimti anema, chuba yimli-i chuba yimli anema rarateptsü.

³Ijip dak tanela makai akümtsü, aser parnok tasa ni samatsütsü; parnoki süngyanglutem, atakatemertem, süli aortem, aser arasenertem bushitsü.

⁴Aser taochi maka yimsüsür ka nem ni Ijip agüjadoktsü; aser chuba tesashi kati parnok madak yimsü asütsü, ta Temeranger Telok KIBUBAi ashir.

⁵Nile tzü kongadoktsü, aser ayongji senzüka tokja kongadoktsü.

⁶Ayongtem shiadoktsü, Ijip ayong tzümesütem achema akümtsü aser kongadoktsü; tzütok aser ayidong azüladoktsü.

⁷Nile anasa moapu, Nile ayongküm anasa, aser Nile agi meketbanga aliba ajak takong akümtsü, aser joko kecha makai kümdaktsütsü.

⁸Angopurtemi mang ayimtsü, aser Nile nung poroki yokertemi ajebtsü, aser shirnoki tzü nung zütsük yoker zükla-a akümtsü.

⁹Ano shirnoki kümpa nemra asüba nung mapa inyaker, aser shirnoki süpo ataker parnok akseta alitsü;

¹⁰shirnok linük nüktangtem lir parnok anüka raksatsütsü, aser ayanger ajak züreptsü.

¹¹Zoan chuba chirtem kanga tamashi lir, Faraoer teshisadangertem shisa takatibatem shisa makai kümogo, “Ne shisa taka chir ka lir, aser akhi chubatem chir ka lir” ta shibai shitet?

¹²Ajangla ne shisa taka nisungtem kong ali? Parnoki tang ne dang shidakjang; aser Temeranger Telok KIBUBAi Ijip indang kechi inyaktsü mulungteta ali, aji parnoki metetdakjang.

¹³Zoan chuba chirtem tamachi kümogo, Memfis chuba chirtem külakkoktsüogo; parnoki Ijip, koba par kintem kinük lung lir, mashileni odakja lir.

¹⁴KIBUBAi parnok telunglen mashikoshi shisatsü meyoktepdaktsü, aser yi agi mesepba nisung saktsüa mangazüba ama, parnoki Ijip pa mapa ajak nung mashileni odaktsü.

¹⁵Temaba mesüra tekübokba süshia, asangdong mesüra tzütok süshia, shingaia Ijip asoshi kecha meinyaktettsü.

¹⁶Iba anogo nung Ijip tetsür mesüka alitsü; aser Temeranger Telok KIBUBAi teka arakzüba, koba pai iba madak arakzür, ibayongji pai atententsü aser tsübutsü.

¹⁷Yihuda lima Ijip asoshi tetsübutsü ka akümtsü aser Temeranger Telok KIBUBAi Ijip anema kechi inyaktsü mulungtet ibayongji nisung shiba dangsa iba indang tetshidir tsübua alitsü.

¹⁸Iba anogo nung Ijip lima nung Kanan o jembirtem, aser Temeranger Telok KIBUBA dang azüngashir yimti pungu alitsü; ka dang “Anü Yimti” ta ajatsü.

¹⁹Iba anogo nung Ijip lima nung KIBUBA asoshi tekülemdak ka, aser arrtsü nung KIBUBA asoshi tongshi ka alitsü.

²⁰Ijip lima nung Temeranger Telok KIBUBA atema temaitsü asoshi aser kuli asütsü asoshi ya alitsü; kechiyong rishikangshir alibayong parnoki KIBUBA dang ayimtentsü, aser pai parnok dangi kümtetdakba ka, aser tashi tulu ka yoktsü, aser pai parnok kümzüktsü.

²¹Aser KIBUBAi Ijip nunger meteta akümtsü, aser Ijip nungeri iba anogo nung KIBUBA metettsü, hau, parnoki tetepsetba tenla aser tarongba tenla tenlatsü, aser KIBUBA dangi atemzüka ayutsü, aser aji inyaktsü.

²²KIBUBAi Ijip nunger dak zükaka, anebtsütsü asoshi dang azüktsü; kodang parnoki KIBUBA dangi meyipdir, parnoki mepishibatem dang pai angatsü, aser parnok anebtsütsü.

²³Iba anogo nung Ijip nungi Asiria tashi lentongbang ka alitsü; aser aji ajanga Asiria nunger Ijip leni aser Ijip nunger Asiria leni aotsü; aser Ijip nungeri Asiria nunger den KIBUBA külemtsü.

²⁴Iba anogo nung Israel Ijip den tasembuba asütsü, aser alima nung temoatsü ka alitsü.

²⁵Kechiyong Temeranger Telok KIBUBAi parnok moaja ashi, “Kü nübur Ijip, aser Asiria kü teka mapa aser Israel kü senmang temoatsü sang.”