Read njo ISAIA 2 Bible Online

ISAIA 2 - njo bible

ISAIA 2

¹Yihuda aser Yirusalem indang Amoz jabaso Isaiai anguba o:

²Tesülen anogo nung ya ataloktsü, oda KIBUBAr ki tenemji, tenemtem kolak nung, ungsem manung ajungketa yutsütsü, aser kin ajak ajagi asentsü.

³Aser nisung jenti arua ashitsü, “Nenok arung, Yakob Tsüngrem kidangi, KIBUBA Tenemi[1] asenok tudi, aser pai pa lenmangtem asenok dang sayutsü, aser pa lenmang nung asenoki jajadi; kechiyong Zion nungi pa tesayubatem, aser Yirusalem nungi KIBUBA o arur.”

⁴ Aser pai kin rongnung o bendangtsü, aser nisung jenti o bendangtsütsü; aser parnoki pei nok agi meritsüng, aser nü agi kolem nok atsüngtsü; kini kin anema nok memekangtsü, mesüra parnoki joko raratsü mangazüktsü.

⁵Oh Yakob kidong, arung asenoki KIBUBA tesangwa nung jajadi!

⁶Kechiyong pai pei nübur, Yakob kidong senzüka yutsüogo, kechiaser parnok anüdoklen tetakzür agi süngogo, aser Filistia nunger ama temezünger agi sünga lir, aser aener den parnoki teka amteper.

⁷Ano parnok lima taribi aser hon agi sünga lir, parnok terizüngdak tatembang maka; ano parnok kor agi sünga lir, parnok talungtsütem tatembang maka.

⁸Parnok lima ano süngyanglu agi sünga lir; parnok pei temeyong agi yangluba, parnok pei teka mapa parnoki külemer.

⁹Aser tajemzükba nisung mechioka aludakja lir, aser tulur nisung ludakja lir; aji asünung parnok dang taitetokma.

¹⁰KIBUBA tetsübutsü tsüngdang nungi, aser pa akhüm tulu sentsüwangshi nungi, lungpoki iang, aser auyi nung na atsüka liang.

¹¹Azüklen talang nung reprangba nisung teküboki aludaktsütsü, aser iba anogo nung KIBUBA dang ajungkettsü aser mezümekümba nisung ila-a kümdaktsütsü.

¹²Kechiyong asükümer aser mezümekümer ajak anema, aser ajungketa alir ajak anema; Temeranger KIBUBA anogo ka lir.

¹³Lebanon nung cedar süngdong talang ajak aser ajungketa aliba Bashan anema;

¹⁴tenem talang ajak anema, aser ungsem ajungketa aliba ajak anema;

¹⁵lungki talang shia anema, aser noktanga aliba atsü ajak anema;

¹⁶Tarshis rong ajak anema, aser mitsa tajung ajak anema, Temeranger KIBUBA anogo ka lir, aser teküboki aludaktsütsü.

¹⁷Aser nisung talang nung tua aliba ajemalua kümdaktsütsü, aser mezümekümer nisung teküboki aludaktsütsü, aser iba anogo nung KIBUBA dang ajungkettsü.

¹⁸Süngyanglutem meshimeshia süitemtsü;

¹⁹aser kodang KIBUBAi alima tashi agi anokshitsü aramesodir, pa akhüm tulu sentsüwangshi nungi nisungtemi lungpoki, aser ali tapoki aitsü.

²⁰Iba anogo nung nisungtemi pei asoshi tekülemtsü yangluba taribi aser hon süngyanglutem, pai shiruru aser laatem asoshi endokadoktsü.

²¹Aser kodang pai alima tashi agi anokshitsütsü aramesodir, KIBUBA tsübuba nungi, aser pa akhüm tulu sentsüwangshi nungi, lungki, aser lung tejakma bushia aitsü.

²²Nisung shiba teni nung tangula ali, pa dak nungi meyipba oang, kechiyong pa kechi züngshitsü nüngdak ali?