Read njo ISAIA 21 Bible Online

ISAIA 21 - njo bible

ISAIA 21

¹Lisem lima indang shin o Tsüngrem mopung Negeb ajanga tashi agi ona aruba ama, ibai lisem lima nungi nunger arur.

²Kü dang mangdang asoshi sayuogo; ashikülakeri ashikülaka benshir, rakzükraktemertemi rakzükraktema benshir. Tuang, Oh Elam; makbangang, Oh Media! Pa anüngba ajak ni tatem kümdaktsüogo.

³Anungji kü teperem tokrongtsü agi süngogo; tetsür nusodang kangshiba ama kü dak tekangshi agi tongogo. Ni mangashitettsüsa ni toushia lir, ni mungutettsüsa ni aoksadakja lir,

⁴kü mulungjang nemzür, tetsübutsü agi ni aoksadaktsür. Ni meima aliba tesangwa ni asoshi tatententsü kümogo.

⁵Parnoki langbang la-a ayur, parnoki parnok lema ayur; parnoki chiyunger aser ajemer; chuba chirtem, aramesoang aser jong nung totzü mezüang.

⁶Kechiyong KIBUBAi kü dang yamai ashir, “Oang mitkar ka yuang, aser pai anguba pa nem metetdakjang!

⁷Pai telok ka ngura, kor nung amener telok anana, gado nung amenba telok, ut nung amenba telok; pai kanga kümdanga angatsüla.”

⁸Aser pai reprang aser ayimten, “Oh, Kibur, ni anüngdang mitsa-semtu nung maneni noktaker, aser aonung shia kü taktang nung alir.”

⁹ Aser, talungtsü nung nisung telok, kor nung amenertem anasa, aruba ajiang. Aser pai langzüa ashi, “Babilon laoa lir; aser süngyanglu angentetba tsüngremtem ajak ali nung ajasaogo.

¹⁰Oh kü monetba, kü motsüngnem chir! Temeranger Telok KIBUBA, Israel Tsüngrem nungi ni kechi angashi, ni ne dang metetdaktsüogo.”

¹¹Duma indang shin o: Seir nungi kari kü dang jadagi: “Mitkar, aonung ya kechi mapang lir? Mitkar, aonung ya kechi mapang lir?”

¹²Mitkari ashi, “Anepdang arur, saka ano aonung; nai ano metetnüra tanaben arung.”

¹³Arabia indang shin o: Oh nenok telok jajaba Dedan nunger shir Arabia arem nung nenok alitsü!

¹⁴Tzürabatem dangi tzü bener arung, jena arurtem chi agüja agizükang. Oh Tema lima nung alir nisungtem!

¹⁵Kechiyong, nok nungi, aser azüa arua aliba lijak nungi, tongbang kanga nungtepdak nungi, parnok jena ogo.

¹⁶Kechiyong KIBUBAi kü dang ashi, “Ano küm ka lir, ayanga alir küm yongsük amato lirbo, Kedar sentsüwangshi ajak tatem akümtsü;

¹⁷aser Kedar chir lijak amer raraba nisung tanüngbatemji ishika dang alitsü. Kechiyong KIBUBA, Israel Tsüngremi jembiogo.”