Read njo ISAIA 22 Bible Online

ISAIA 22 - njo bible

ISAIA 22

¹Ibai Mangdang Lenten indang shin o: Tang, ajak kilemmai tua aliba ya nenok kechi asü?

²Oh na ayimtenba ola aser rongrongshishiba yimti, tepela yimti; ne tetepsetbatem, nok agi tepsetba masü, mesüra tongbang nung asüba masü.

³Ne yimsüsür ajak külemi jena oadok; parnok lijak kecha mamshi-i dang apu, parnok talangka jena oaka tangur ajak külemi apu.

⁴Anungji ni ashi, “Ni tereprang, ni kanga kua ajebtsü; kü nübur jala samatsübayong, ni süneptsütsü temerang.

⁵Kechiyong Mangdang Lenten nung Temeranger Telok KIBUBA, nungi iba terongrongtsü, ajemzüka yoktsü, aser jara raksatsütsü, aser tenem dang ayimtenba anogo lir.”

⁶Aser Elami temeranger nisung telok aser kor nung amenertem den lijakjang asemba juli aben; aser Kir nungertemi jong menembangi ayu.

⁷Nenok teshimtet lententem talungtsü agi sünga liasü, aser kor nung amenba nisungtem parnok sasa süngkhüm nung tareni ali.

⁸Aser Yihuda tenoktangtsü yanglubatem chirep. Iba anogo nung nenoki arem ki nung nok o nü bushia ao.

⁹Dawid yimti nung tapok aika aliba dak nenoki temulung agütsü; aser teküboklen moti aliba tzü nenoki aniten.

¹⁰Ano nenoki Yirusalem nung ki züngdang, aser atsü jara yanglushitsü asoshi kitem nenoki bensa;

¹¹aser atsü jara ana tsüngda nung nenoki moti tejenba tzü asoshi tzü rizüngdak yanglu. Sakasa shibai ya inyak aser talangka nungi shibai ya asatet pa dang nenoki temulung magütsü.

¹²Temeranger Telok KIBUBAi, iba anogo nung nenok dang ajebtsü aser mang ayimtsü asoshi, aser tekolak südoktsü aser anemsü agi nangri akangtsü asoshi aja;

¹³ saka ajiang, pelashishia, pelatepa nashi pungchi aser san tepseta, shi chia yi jemtep, “Asenoki chia-jemdi, kechiyong asüngbo asenok asütsü” ta nenoki bilem.

¹⁴Saka Temeranger Telok KIBUBAi pei sasa kü narong agi angashia jungkai adokba KIBUBA shin o Temeranger Telok KIBUBAi ashir, “Atangji nenok masü tashi iba temenen menaba mopungdoktsü.”

¹⁵Yamai Temeranger Telok KIBUBAi ashir, “Arung! Oang, aser chuba ki madak ketdangpur, Shebna dang shiang.

¹⁶Na yangi kechi asür aser yangi shiba ali, oda na asoshi yangi leper angenteta, ne leper temalen talang nung angenteta na pei asoshi lung manung ki yangluba ya kechi?

¹⁷Ajiang! Oh tashi tait nisung, KIBUBAi na merepdokadoktsü, hau, pai ne dak akang akanga amentsü.

¹⁸Aser anglong ka mesüka, lunga lunga alinük talangi ontaktsütsü. Yangji na asütsü, aser ne sentsüwangshi talungtsütem ajagi aotsü, ne KIBUBAr ki asoshi na maksütsü!

¹⁹Ni na ne mapa nungi endoktsü, aser na talidak nungi na atsüzüktsü.”

²⁰Iba anogo nung ni kü tenzüker Hilkia jabaso Eliakim ajatsü;

²¹aser ni ne sobutsü pa dak sobutsütsü, aser ne peremlen agi pa dak nangri kangtsütsü; aser ne bangdak pa nem agüjadoktsü aser Yirusalem nung alirtem aser Yihuda kidong tebu pa akümtsü;

²² aser Dawid kidong sabi ni pa tapubang nung ataloka yutsütsü, aser pai lapoktsü aser nisung shingai mashitsü, aser pai shibangtsü aser nisung shingai melapoktsü.

²³Aser akanga alidak ni pa kojal ama angenloka yutsütsü, aser tebuer ki asoshi pa tetushi chuba menden akümtsü,

²⁴aser tebuer ki sentsüwangshi ajak, chirnur aser tasoba marok enrok tila shia nungi tezüoktsü marok ajak parnoki pa dak iloktsütsü.

²⁵Iba anogo nung, Temeranger Telok KIBUBAi ashir, “Akang, akanga alidak angenba kojal kotangtsü, aser aji lensüka yoktsü aser tsüktsü, aser iba manung aliba khu lepdoka adoktsü, kechiyong KIBUBAi aji jembiogo.”