Read njo ISAIA 23 Bible Online

ISAIA 23 - njo bible

ISAIA 23

¹ Tair indang shin o: Ayima jebang, Oh Tarshis rongtem, kechiyong ki maka aser kilungi aitsü makatsüsa aji raksaja lir. Kittim lima nungi aji parnok dangi jungkai adokogo.

²Tzüküm linük nung alirtem ajemajema liang, Sidon nunger shishirtem, parnoki tzüyim sema jaja.

³Shirnok shishilembaba tzü tesadem nung liasü, shirnok Nile nungi alu arur, shirnoki kintem nungi shishilempaba agi pa tajangzük ngua liasü.

⁴Na akseta liang, Oh Sidon kechiyong tzüyim mitsa, tzüyimi jembiogo aser ashi, “Ni nusotsü mekangshi, mesüra mesotsüka, mesüra ni asangurtem, mesüra aiürtem memesütetka.”

⁵Kodang osangji Ijip tongdir, parnok Tair osang agi kanga timatemtsü.

⁶Nenok Tarshis leni ayima jenang, nenok tzüküm linük nung alirtem.

⁷Nenoki tugutettsüba nenok yimti, alemli nungi tenzüka alibaji, shiba tetsüng agi pa talang nung alitsü bener ao, aji ya asü?

⁸Tair, koba chuba korang agütsüsang, koba nung shidi shishirtem chuba chirtem liasü, aser koba nung alima nung tetushitsü shishilempartem liasü, iba anema shibai yamai tasa asa?

⁹Asüküm sentsüwangshi ajak menendaktsütsü, alima nung tetushitsü ajak sensatsütsü asoshi Temeranger Telok KIBUBAi aji asatet.

¹⁰Nile ayong südaka alu yimang Oh Tarshis jalatem, joko tetsükdaktsü kecha maka.

¹¹Tzüyim manung pa teka songtoka lir, pai chuba yimlitem anokshitsüogo: Kanan indang, iba nung mitsa samatsütsü asoshi KIBUBAi temelaba agütsüogo.

¹²Aser pai ashi, Na joko mepelatsü, Oh na tekangshiba Sidon jala aiür! Aramesoang, Kittimi oang yangjia na anisüngzük makatsü.

¹³Asiria nunger masü, saka Kaldi nungerji ajiang; shirnoki Tairji arem shiruru talidak asütsüsa tia lemzüktsüogo; parnoki tamaktsü semtutem yangluogo; parnoki la chuba mendentem rongtoktsüogo; parnoki laji teraksaba telong ka kümdaktsüogo.

¹⁴Asatepang, nenok Tarshis rongtem, kechiyong nenok mitsa teraksa nung toktsü.

¹⁵Idangji chuba kidong ka kopiga alir yamaji küm neter tatem tonger külen ken nung nüktapangtatsür ama Tair amadoktsü; aser küm neter tatem tonger külen ken nung nüktapangtatsür ama Tair asoshi alitsü.

¹⁶Yimti nung nemzütsü ne tatemba kongki bena arung, aser amadoka aliba ne nüktapangtatsür kensü tajung tenang, na bilemtettsüsa ken aika tenang!

¹⁷Küm neter temer külen, KIBUBAi Tair semdangtsü, aser pai pei ayanger dangi meyiptsü, aser ali nung alima chuba yimti ajak den nüktapangtatsür jilu aitsü,

¹⁸Pai shishilempaba agi kechi ajangzükdir KIBUBA asoshi temeshi alitsü; aji rizünga mesüra bendena mayutsü, saka KIBUBA madang shirnok alir parnok teperi achitsü, aser süoshi tajung abentsü parnok nem agütsütsü.