Read njo ISAIA 24 Bible Online

ISAIA 24 - njo bible

ISAIA 24

¹Ajiang, KIBUBAi alima tazüngla kümdaktsütsü, aser aji jendokadoktsü, aji meyipdaktsütsü, iba nung alir nisung ajaklen prokshidaktsütsü.

²Aser aji nisungtem dang koma yamaji putir dang, aser kilir dang koma yamaji kibur dang; kilirla dang koma yamaji kiburla dang; talir dang koma yamaji tayoker dang; taputsür dang koma yamaji tapusang dang; tagizüker dang koma yamaji tagütsüsang dang, aji oda alitsü.

³Alima meshimeshia azüngtettsü aser meshimeshia makzükadoktsü; kechiyong KIBUBAi iba o jembiogo.

⁴Aiji akonger aser remzüka aor, alimaji tashi maiti azülar alima denji külemi anüngtemjia azüla-a aor.

⁵Ali nung alirtemi alima menentsür, kechiaser parnoki ozüngtem raksatsü, yimsü ozüng melenshi, tatem maka tezüngzüktepba raksatsü.

⁶Anungji atakatemi alima meyoker, shirnok iba nung alir parnok dak tai angur; meimchirtem sümar, aser nisung ishika dang anünga lir.

⁷Yi lanui mang ayimer, tsükmenatzü tetong kongsüka adoker, pelashishia alir ajak shisa atemer.

⁸Asüm agi menüremba anener, shirnok pelateper parnok ola tatem akümer, tatemba kongki agi pelaba anener.

⁹Parnoki joko ken tena yi majemtsü; mejemtzü shirnoki ajemer parnok dang aji taku alitsü.

¹⁰Temakmakba yimti laoa lir, nisung shinga maittsüsa ki ajak shibanger.

¹¹Yi agi anüngba asoshi yimdong nung ayimtenba ola lir; sasa pelar ajak shimaka lir, linük nung menüremtepba samaogo.

¹²Yimti nung teraksa tokja lir, aser iba süngkhüm teraksa lir.

¹³Kechiyong aji oliv süngdong sükzüka aongdang, mesüra tsükmenatzü aongeri tejep menüngshiba ama, nisung rongnung yamaji alima nung alitsü.

¹⁴Parnoki ola adoktsü, parnoki ayimtentsü, KIBUBA akhüm tulu asoshi parnoki ola tulu agi anüolen nungi ayimtener.

¹⁵Anungji, Israel Tsüngrem, oda KIBUBA tenüng, tzüyim küm lima nung, anüdoklen nenoki KIBUBA sentsüwangshiang.

¹⁶Alima tatem nung tenüngsang ken temeshiba asoshi sentsüwangshi ta onoki angashiogo. Saka ni ashi, ni kongrasüker, ni kongrasüker; ni aiatai! Külakkübongertemi külaka benshir, atangji külakkübongertemi kanga külakkübonga benshia lir.

¹⁷Tetsübutsü kangla aser sang ne madak lir, Oh alima nung alir nisungtem!

¹⁸Aser shiba tetsübutsü ola nungi jendir kangla nung tsüktsü; shiba kangla telung nungi adokdir sang nung aputsü; kechiyong temalen kichibatem lapoka lir, aser alima kimung atashir.

¹⁹Alima jungjunga raksaogo, alima meshimeshia yimsa-a ogo, alima kanga atashiogo.

²⁰Yi agi mesepba nisung ama alima mangazütsü, aser semtu ama oli aruli ta arakzütsü, aser iba ozüng raksaba iba madak tulu alitsü, aser aji laotsü aser tanaben meshishitsü.

²¹Iba anogo nung ya ataloktsü, oda KIBUBAi temalen talang nung aliba temeranger aser alima nung alima chubatem merenshitsü.

²²Aser tepuokertem kangla nung anitena ayuba ama parnok külemi anitentsü, aser tepuokdak shibanga adoktsü, aser anogo aika lir külen parnok merenshitsü.

²³Idangji ita shimakadoktsü, aser anüi aktsü, kechiaser Zion nung, aser Yirusalem nung aser pa tamburtem madang sentsüwangshia Temeranger Telok KIBUBAi chubatsü.