Read njo ISAIA 25 Bible Online

ISAIA 25 - njo bible

ISAIA 25

¹Oh KIBUBA, na kü Tsüngrem lir; ni na ulutsütsü, ni ne tenüng asangtsü; kechiyong nai sayatenyatem inyakogo; alemli nungi tasa asaba temulung alemba atangji nung atalokogo.

²Kechiyong nai yimti ka chirepdakja tanang ka kümdaktsü, aser mitsa yanglua aliba yimti teraksa kümdaktsü; Bendangertem lungki joko malitsü; aji tanaben kodanga meyanglutettsü.

³Anungji tashi tait nisungtemi na sentsüwangshitsü, tetsübutsü kintem yimti-i na tsübutsü.

⁴Kechiyong tesashi nisungtem ain adokba atsüki jara anema yipru aitba ama alidang na sensaker dang tashi tait mitsa ama, mokokmeiner pa tejashi mapang nung tashi tait mitsa yipru nungi jenokdak, tatsük nungi akhüm ka alitsü.

⁵Kong konga alidak tatsük ama, nai Bendangertem ola madoki kümdaktsü; mepet akhüm nung tatsük ama taochi makaba nisungtem ken atenba nai anendaktsütsü.

⁶Iba tenem nung Temeranger KIBUBAi nisung ajak asoshi teyari osettem benjong, yi tejok manung asüngtetba teyari osettem tenüngla agi sünga, tejok manung jungjunga asüngtetba yi benjong yanglutsü.

⁷Iba tenem nung pai nisung ajak manung tema tenembangba, aser kin ajak madak temeibangbaji samatsütsü.

⁸Pai teti asoshi tasüba meyokadokogo. Aser KIBUBA Tsüngremi tenük ajak nungi nüktzü aidoktsütsü; aser pai nübur tarütsüba alima ajak nungi agientsü; kechiyong KIBUBAi jembiogo.

⁹Iba anogo nung ya oda ashitsü, “Angang, ibai asen Tsüngrem lir, asenoki pa ata-a liasü, pai asenok kümzüktsü, kechiyong ibai KIBUBA lir, asenoki pa ata-a liogo, pa tekümtet nung asenok pelashishia pelateptsü.”

¹⁰Kechiyong iba tenem nung KIBUBA teka ataloka alitsü, aser Moab pei talidak nung, rüja ongken tzü nung monü ajemsatsüba ama, ajemshitsü.

¹¹Tzüwari pei teka tzüwatsü songtok ama, pai parnok rongnung pei teka songtoka alitsü, pa ket agi tapu meyina asameyangaka pa asükümba teküboklen ludaktsütsü.

¹²Par mitsa jara talang pai aludaktsütsü, nema kümdaktsütsü aser oda ali tonga ali den medema aludaktsütsü.