Read njo ISAIA 27 Bible Online

ISAIA 27 - njo bible

ISAIA 27

¹ Iba anogo nung KIBUBAi pei nok techira tulu aser tashi tait agi ngüm tekara molutzürangji, oda tekirak per molutzürangji merenshitsü; aser tzüyim nung aliba ngüm molutzürang[8] pai tepsettsü.

²Iba anogo nung ya oda ashitsü: Jangratemtsü tsükmenatzü tsüki, nenoki iba indang ken tenang!

³Ni KIBUBAi ibai ayur, mapang shia ni iba dak tzü aener; kari aji raksaja lir ta ni aji aonung aser anüngdang anüker.

⁴Ni terasatsü kecha maka, ni anema ai aser ayidongi tongbang jazük asübo, ni parnok anema apusotsü, ni parnok külemi rongtoktsütsü.

⁵Aji oda mesüra parnok sasa kü küboki aita kü den yimjung yangludakjang.

⁶Iba anogo nung Yakob tera ayangtsü, Israel pungyatsü aser temechi mechitsü; aser parnok tejang agi alima ajak asüngtsü.

⁷Shirnoki parnok dak azük parnok dak azükba ama, pai parnok dak azüktsü asü? Mesüra shirnoki parnok tepset yamaji parnokjia tepsettsü asü?

⁸Pai parnok asazük asazüka pei lima nungi aridoka apuso; anüdoklen mopung aonba anogo nung pai parnok tesashi mopung agi oner odaktsü.

⁹Anungji iba agi Yakobi menaba taiji pungitsü, aser pa temenen endokba tejang ajak ibaji alitsü; oda parnok tenladak lung ajak shinü lung ama anüka akusadaktsütsü, oda Asherim mesüra liangmesen tenladak joko meyangludaktsütsü.

¹⁰Kechiyong noktanga ayuba yimti azüngmeyaka, arem mesüka toktsür aser senzüka yuja lir; yangji nashi chanu chiyimtsü, aser yangji pa mepitaka alitsü, aser yangji aliba kongsangtem metepa achitsü.

¹¹Kodang iba süngsangtem kongadokdir, tetsürtem arutsü, aser mi senoktsütsü; kechiyong ya tangatetba makaba nübur lir; anungji shibai parnok yanglu pai parnok indang aria mebilemtsü, aser shibai parnok kümdaktsü pai parnok dak mesakloktsü.

¹²Iba anogo nung Eufrata ayong nungi Ijip ayong tashi KIBUBAi tsükjong nung tsük netzüktsü; aser Oh Israel chirtem, nenok ka khen ka khen ta shitentsü.

¹³Iba anogo nung jangzü tulu aputsü; aser shirnok Asiria lima nung sama-a ali, aser shirnok mezüngsemba kin Ijip lima nung lir, arutsü aser Yirusalem temeshi tenem nung KIBUBA parnoki külemtsü.