Read njo ISAIA 28 Bible Online

ISAIA 28 - njo bible

ISAIA 28

¹Yi agi mesepa aliba parnok ali lenten tajung tekolaklen aliba, par sentsüwangshi tobur tajung remya-a aliba naro aser Efraim yi agi mesepba pur mezümeküm asoshi aiatai!

²Ajiang, KIBUBAji tashi tulu aser tashi tait ka lir; rürlung tesashi, teraksatsüba yipru ama; tashi tulu, moshia ayimba tzü ama; pai tashi agi ali nung tsükdaktsütsü.

³Efraim yi agi mesepertem mezümeküm korangji tetsüng kübok ajemshitsü;

⁴aser par sentsüwangshi tobur tajung remya-a aliba naro koba ali lenten tajung tekolaklen lir, mei matongdang atangba munguzünu ama alitsü, nisungi aji ngulidang pa ket nung ano alidang chiadoker.

⁵Iba anogo nung Temeranger Telok KIBUBAi sentsüwangshi chuba korang asoshi aser anünga aliba pei nübur asoshi tobur tajung chuba korang asütsü.

⁶Aser shibai obendangdak amener, pa asoshi ochiba tanela, aser shirnoki tongbang meyipa süngkhüm leni odaktsür parnok asoshi tashi alitsü.

⁷Itemia yi aser mejemtzü ajanga mangazür aser mashileni ogo; putir aser nüburtem mejemtzü ajanga mashileni ogo, yi agi parnok meyokadokogo, aser mejemtzü agi parnok mashileni ogo, tangutsü ain nung parnoki aibelener, obendang agütsüba nung parnok metsüdaker;

⁸kechiyong langbang ajak saktsüba aser arü aketba agi sünga lir, aji asünung temerükdak maka.

⁹“Shiba dang pai temetettsü shisatsü sayutsü? Aser shiba dang pai osangji angatetdaktsütsü? Kinü tanurtem mama tokli, tang mama nungi atsüzükli alir dang asü?

¹⁰Kechiyong aji ozüng ka süli ozüng ka; ozüng ka süli ozüng ka; taren ka süli taren ka, taren ka süli taren ka, yangji teraka, yangjia teraka, ta sayutsü meranger.”

¹¹ Hau, temeli reptakreptaka aser bendanger o ajanga pai iba nübur den jembitsü.

¹²Parnok dang pai ashi, “Ya anisüngzük lir, aniseta alisang nem nenoki anisüngzük agüjang, aser ya tashi süngjemshitsü lir;” aji saka parnoki mangali asü.

¹³Anungji KIBUBA O parnok asoshi, ozüng ka süli ozüng ka, ozüng ka süli ozüng ka; taren ka süli taren ka, taren ka süli taren ka; yangi teraka, yangji teraka, oda parnok pei lenmangi oa pulashia laotsü, raksatsü, aputsü aser agitsü.

¹⁴Anungji Yirusalem nung nübur madak yimsü asüba nenok tatalatsür nisung, KIBUBA O angang:

¹⁵Kechiaser nenoki ashi, “Tasüba den onoki tezüngzüktepba ka yangluogo, aser Sheol den onok tenangzüktepba lir; kodang moshia ayimba temerenshi süidir, aji onok dangi marutsü, aser asen jenokdak tiyazü aseni kümdaktsüogo, aser yazüyapongba kübok asen sasa atsükogo.”

¹⁶ Anungji KIBUBA Tsüngremi yamai ashir, “Ajiang, ni Zion nung kimung ka asoshi lung ka, tetendangba lung ka, senti kinük lung kimung takang ka azünger; shibai amanger pai meilungtsü.”

¹⁷Aser ni obendangbaji tasadangba lisü, aser temeshibaji lisü sentakba tasadangba lung kümdaktsütsü; aser rürlong jagi tiyazü jenokdak oktoktsütsü, aser tzütemi tatsükokdak moshia yimdaktsütsü;

¹⁸aser tasüba den nenok tezüngzüktepba meshimeshia samatsütsü, aser Sheol den nenok tenangzüktepba mataloktsü, kodang moshia ayimba temerenshi ajanga süidir, idangji iba agi nenok teküboklen ajemshidaktsütsü.

¹⁹Kwiben aji ajanga süidir, aji agi nenok yirutsütsü, kechiyong aji anepdang shia aser anüngdang aser aonung shia ajanga süitsü; aser osangji angatettsü tetsübutsü dang alitsü.

²⁰Kechiyong yiptenji nisungi pei sasa iba ma nung songtoktsüba dang nungi tatsüba lir, aser tabentsübaji nisungi iba agi lungbangtsüba dang nungi tilaba lir.

²¹ Kechiyong pa mapa inyaktsü, pa tesüngmangtsü mapa, aser pai pa tesüngmangtsü mapa, pa mapa atalokdaktsütsü asoshi, Perazim nung ama KIBUBA aramesotsü, aser Gibeon lenten nung ama pa ain adoktsü.

²²Anungji tang, nenok talenba akangshija lir nenok tatalatsürtem teküm; kechiaser Temeranger Telok KIBUBA nungi, tesamatsütsü ternem kümdaktsütsü ta ni alima ajak anema angashiogo.

²³Nenok tenarong tenang, aser kü ola angashiang; temulung agüjang, aser kü o angang!

²⁴Alu alari maneni metsü proktsü alu alar asü, pai teti ali angenpoka angensar asü?

²⁵Kodang tema medem medema kümdaktsüdir, pai ajaklen azüngken aser an menemtsü meprokshir ama, wheat tsük lu nung tareni aser barley lu nung wazüka alidak aser iba tezülen am yangluba tsük meprokshidaktsür ama?

²⁶Kechiyong par Tsüngremi pa dang shitak tuyur aser pa dang sayur.

²⁷Kechiyong an menemtsüji temenüngtsü oset techira agi memenüngsar, mesüra alizüngken talungtsü tsüng agi memenünger; saka, an menemtsüji rangdong agi ateper aser alizüngkenji ajok agi ateper.

²⁸Amtsük menüngsar asü? Masü pai aji teti mameter aser pa talungtsü tsüng aser pa kortemi aji yashia yuaka, pai aji memenüngsar.

²⁹Ibaia Temeranger Telok KIBUBA nungi aru, koba teshisadangba nung tesüngmangtsü, aser shisatsü nung tajungtiba lir.