Read njo ISAIA 29 Bible Online

ISAIA 29 - njo bible

ISAIA 29

¹Hai! Ariel, Ariel, Dawidi tanendak yangludak yimti, na asoshi aiatai! Küm nung küm süklokang, benjongbentsü meyiptepa arudakjang!

²Idangji ni Ariel jashidaktsütsü, aser yangji jeptepba aser mangyimba alitsü, aji saka la kü madang Ariel sa alitsü.

³Aser ni na anema meketa arü amentsü, aser na anema mitsa sabang atemtsü.

⁴Aser na teküboklen anizüktsü, aser ali nungi ne ola nema adoktsü, ali nungi tamajung tanela ka ola ama adoktsü, aser ali nungi ne o jembiba ola tila adoktsü.

⁵Saka ne tsükchir telok auyi tenemnem ama alitsü aser tetsübutsü nisung telokji pungshia aoba tsüksü ama alitsü; hau, aji khenyongi aser aoksa-a ataloktsü.

⁶Temeranger Telok KIBUBAi tsüngmok agi menoknok aser ola tulu agi, Tsüngrem mopung, yipru mopung agi aser temeyokba mi agi la semdangtsü.

⁷Aser Ariel anema raraba kin ajak, oda la anema aser la tashi tait mitsa, aser la jashidaktsüba anema raraba pungmang ka ama, aonung mangdang ka amai alitsü.

⁸Yaseta aliba nisungi pa pungmang nung chi chiyunger, aser pa tip metemi sakba amai; mesüra tzüraseta aliba nisungi tzü jema pungmanger, tzüra metemi lula-a sakba amai alitsü; Zion tenem anema raraba kin ajak telok yamaji alitsü.

⁹Nenok mangmangtepang aser süngmangtepang, nenok sasa tenük pokang, aser tenük poker liang; parnok mesepogo, saka yi agi masü; parnok mangazür, saka mejemtzü agi masü!

¹⁰ Kechiyong KIBUBAi nenok madak sümanga amua aotsü tanela meküploktsü, aser ainkartem, nenok tenük shibangja lir; mangdang ngur nenok tekolak pai nembangja lir.

¹¹Aser iba mangdang ajak tezüluba ajena aliba o ama nenok madang lir, koba nisung kati temeteter ka nem agütsüdang, “Yimlibilema ya züngang” ta mepishira, pai ashitsü, “Ni makok, kechiyong ya ajena lir”

¹²mesüra kati shiba temeteter masü pa nem agüja, “Yimlibilema ya züngang” ta shira, pai ashitsü, “Ni temeteter masü.”

¹³ Idangji KIBUBAi ashi, “Kechiaser iba nüburtemi tebang agi ni anasai arur, aser parnok tebilembatem kü dang nungi talang nung ayur, parnok tebang agi kü akhüm tsübur, aser ni asoshi parnoki tetushi sayubaji nisungi sayuba oda yimbazüa angazükba dang lir.

¹⁴ Anungji ajiang, ni iba nübur rongnung oda tesüngmangtsü mapa aser sayatenya tanaben inyaktsü; aser parnok shisa taka nisungtem shisa samatsü, aser parnok tangatetba nisungtem tangatetba miima alitsü.”

¹⁵Shirnoki pei tasatem KIBUBA nungi nembangtsü asoshi aroka yanglur, parnok asoshi aiatai; parnoki mapatem ammang nung inyakteper, aser parnoki ashir, “Shibai onok angur? Shibai onok metet?”

¹⁶ Nenoki mapa mashikoshi kümdaktsür! Poteper ajongli dang nungi taoba masü no? Yanglua akaba oset jagi iba yanglur dang, “Pai ni yanglu” ta shidi ma? Mesüra, shibai oset yanglu pai yangluba indangji, “Pa tangatetba shisatsü maka” ta aji agi shidi ma?

¹⁷Lebanon süngjang atangba linük kümdaktsütsü, aser süngjang atangba linük arem akümtsü ano mapang tatsüka dang mali no?

¹⁸Iba anogo nung tenarong tajaki kaket nung otem angashitsü, aser mejangjaba aser tammang nungi nükpokeri angutsü.

¹⁹Ano ajemalurtem pei tepela KIBUBA nung renloka akümtsü, aser nisung rongnung sensakeri Israel Temeshiba dak pelateptsü.

²⁰Kechiyong, tatinemti yimsüsür sama-a akümtsü, aser tatalatsür anemer, aser tamajung sentong bushir ajak;

²¹shirnoki nisung kar taitsütsü o koloktsür aser shirnoki süngkhüm nung sang soa yutsür aser shirnoki ochishir amajok kümdakja endoktsür ajak leptoktsütsü.

²²Anungji Abraham kümzükba KIBUBAi Yakob kidong indang yamai ashir, “Tangbo Yakob akseta malitsü, mesüra pa tejak pakla-a makümtsü.”

²³Kechiyong kodang par chirtemi parnok rongnung kü ket agi inyakba ngudir, parnoki kü nüng meshitettsü, hau, parnoki Yakob Temeshisang meshitettsü, aser parnoki Israel Temeshiba akhüm tsübutsü.

²⁴Shirnoki obendangba nung aibelen parnoki angateta arutsü, aser shirnoki nemnem parnoki tesayuba angazüktsü.