Read njo ISAIA 3 Bible Online

ISAIA 3 - njo bible

ISAIA 3

¹Kechiyong ajiang, KIBUBA Temeranger KIBUBAi Yirusalem nungi aser Yihuda nungi taka temang, amtsük akaba ajonga, aser tzü akaba ajonga bener oadoktsü;

²tashi tulu nisung aser temeranger, obendanger aser ainkar, tetakzür aser tamburtem;

³tenem madak arkotong aser yimsüsürtem, teshisadanger, tesangra tepuar aser mongyin arasener.

⁴Ni parnok madak tanurtem chuba kümdaktsütsü aser kinütemi parnok madak yimsü südaktsütsü,

⁵Nisungtem rongnung kati ka kangshiteptsü, kiyonger kati ka kangshiteptsü, tanuri tain mezüngmeshitsü, samesa nisungi yimsüsür mezüngshitsü.

⁶Kodang nisung kari adianu ka pa tebuer kidang soter, “Ni sobutsü lir, na onok madak yimsüsür sang, aser iba teraksa madak na asa sang,” ta shidir

⁷iba anogo nung pai ola adoka ashitsü, “Ni tanebtsür ka masütsü, kechiyong kü kidang amtsük mesüra süoshi maka, nenoki nisungtem madak ni yimsüsür mekümdaktsütsü.”

⁸Kechiyong Yirusalem raksa-a lir, aser Yihuda laoa lir; kechiaser parnok o jembiba aser parnok mapa agi, KIBUBA sentsüwangshi tatenba anema lir.

⁹O bendang dang, parnoki tejak reprangba agi parnok anema kuli agütsür, Sodom mesüka parnoki pei temenen metetdaktsür, aji miima mayur. Parnok pei tanela asoshi aiatai! Kechiyong parnoki pei dak parnok tamajung inyakogo.

¹⁰Temeshipur asoshibo junga alitsü, kechiyong parnoki pei inyakba tejang achitsü.

¹¹Tamajunger asoshi aiatai! Pa asoshi tamajung alitsü; kechiyong parnok teka mapa tajangzük meyipa parnok nem agütsütsü.

¹²Kü nübur asoshi, parnok rishikangshirtemji tanurtem alitsü, aser tetsürtemi parnok madak yimsü asütsü. Kü nüburtem, nenok tanishirtemi nenok mashileni anir, aser nenoki anitaktsüba lenmang aitepdaktsür.

¹³KIBUBAi obendangdak noktaker tejakleni arur, pai pei nübur o bendangtsü noktaker.

¹⁴KIBUBAi pei nübur tamburtem aser tanishirtem den o bendangdaki aitsü; “tsükmenatzü lu nenoki tazüng kümdaktsü, sensaker rakzükraktemba nenok kidang lir.

¹⁵Kü nübur tepsatsüba aser sensaker tejak menüngsatsüba ya nenoka kechi tetezü?” ta KIBUBA, Temeranger KIBUBAi ashir.

¹⁶KIBUBAi ashir, “Zion jalatem asüküma lir, aser parnok tekong atsülanga aser tenük jalua, parnok jajadang kentamata-a aser parnok tetsüng nung ting ting ta asadakja jaja nungji,

¹⁷KIBUBAi Zion jalatem tekujong nung anakra adokdaktsütsü, aser KIBUBAi parnok mangsa toktsütsü.”

¹⁸Iba anogo nungji KIBUBAi parnok azük-naro tenüklang küri, kupok, keptangzük,

¹⁹tongbang, kisen aser tekong meiba sü,

²⁰korang, tetsüng yinzü, peremlen, teronem bongdang aser tepuatsü;

²¹angoti, aser teni küri,

²²benjongbentsü sobutsü, sepoksü, amungloka abenba sü, yangku tila,

²³tanüdangtsü, kümpa sü tanük, kolakjen, aser süku meyiba sü bener aotsü.

²⁴Aser ya oda ataloktsü, teronem melena teshinem, peremlen melena lisü, ku tajung melena lemtsü, tamaren sobutsü melena anem sü abenba, tobur tajung melena maksü alitsü.

²⁵Ne nisungtem nok agi, aser ne temerangertem tongbang nung laotsü.

²⁶Aser la süngkhümi menungratsü aser mang ayimtsü, aser la azüngazünga alitsü aser ali nung amentsü.