Read njo ISAIA 30 Bible Online

ISAIA 30 - njo bible

ISAIA 30

¹KIBUBAi jembiogo, “Tashi mangaba chirtem aiatai, shirnoki shisatsü agir, saka ni nungi masü; shirnoki temenen ka dak temenen ka enloka, tenembangtsü agi nembanga ayur, saka kü tanela agi masü.

²Shirnoki kü dang shisatsü masüngdangi Ijipi apusoa, Farao tashi nung parnok sasa jenoktsü, aser Ijip akhüm nung tamang akatsü asoshi alu!

³Atangji Farao tashiji nenok maksütsü aser Ijip akhüm nung tamang akabaji nenok makmakshishitsü alitsü.

⁴Kechiyong par chubatem Zoan nung liaka aser par otongdartem Hanesi arua liaka,

⁵Parnok nem tajangzük agütsütsü makokba, oda teyari mesüra tajangzük magütsütetba nübur ajanga parnok maksütsü aser tenüng menüktsüsang asütsü.”

⁶Itemi Negeb shiruru indang shinba o: “Timtem aser touashiba lima ajanga, kechi nungi molusongzü tetsü aser tepung aru, mim per aser mi ama yima aoba per, parnoki pei rongsentem gado rongdong nung aser parnok terizüngba rongsen ut warotem kong nung bener parnok nem tajangzük magütsütetba nübur dangi aor.

⁷Kechiyong Ijip teyariji amajok aser kecha tagidak maka, aji asünung ni la dang mena alila Rahab ta aja.”

⁸Tang oang aser tarutsü mapang nung kuli asütsü parnok madang aji lungpak ka nung züluang, aser kaket ka nung züluang;

⁹kechiyong ibai tashi mangaba nüburtem, temulung matangba chirtem, KIBUBA sayutsüngiba mangatsüba chirtem lir;

¹⁰parnoki mangdang angur dang, “Tungu” ta ashir aser ainkar dang, “Kechi shitak aji teshin, onok dang ojung dang jembiang, külakkübonga shinang;

¹¹lenmang nungi nenok adokadokang; lendi nungi meyipa aenshiang! Israel Temeshisang onok nem tangashidaktsü” ta ashir.

¹²Anungji Israel Temeshisangi yamai ashir, “Kechiaser nenoki iba o sensatsür, aser tekülak aser tekirak nung tamang akar aser item dak metaloka alir;

¹³anungji iba tai menaba nenok madak jara talang kangsa-a telaor aliba aoksa-a raksa-a aluba ama nenok madak alitsü.

¹⁴Aser pai aji poteper po kecha manüngi anüka raksaba ama raksatsütsü, anungji iba anüka ajasaba rongnung mimung nungi mi benshitsü, mesüra tzübong nungi tzü atatsü porep kata mangutsü.”

¹⁵Kechiyong Temeranger Telok KIBUBA Tsüngrem, Israel Temeshisangi yamai ashir, “Meyipba aser anisüngzükba nung nenok kümzüktsü, ajemajema aliba nung aser temulung alemba nung nenok tashi alitsü; aser nenoki ma asür.”

¹⁶Saka nenoki ashi, “Masü! Kor nung onok ajentsü; anungji nenok jena aotsü! aser tekara kor nung onok asangtsü; anungji nenok arishirtem tekara alitsü!

¹⁷Kati jazük nung meyirijang ka ajentsü, pungui ayongzük nung nenok, tenem nung aliba temaitsü oset ka amai aser ungsem nung nisan ka amai nenok metoktsü tashi ajentsü.”

¹⁸Anungji nenok dang taochi akatsü KIBUBAi ata-a alitsü, aser pai nenok dang aochitsü asoshi pa aramesotsü; kechiyong KIBUBAji ochiba Tsüngrem lir, shirnoki pa asoshi atar, parnok ajak temoatsüba.

¹⁹Kechiyong Zion nübur shirnok Yirusalem nung alir, joko nenok majebtsü; nenok ayimtenba ola angashidang pai nenok dang aochitsü; pai angashidang, pai nenok dang langzütsü.

²⁰KIBUBAi nenok nem timtemba chi aser tekangshitsü tzü agütsü, saka nenok tesayuri joko pa sasa atsüka malitsü, saka nenok tenüki pa angutsü.

²¹Aser kodang nenoki tajichilen mesüra tabelen meyipdir, nenok tenarongi nenok tesülen ola kati shia angashitsü, “Lenmang ibai lir, iba nung jaja-ang!”

²²Aser taribi yanglokba nenoki chitetba süngyanglu nenoki menendoktsü; memerükba oset ama nenoki item mopung nung prokdoktsü, nenoki item dang ashitsü, “Oadokang!”

²³Idangji pai nenok metsüjang asoshi tzünglu agütsütsü, koba agi nenoki metsü proker, aser wheat tsük tajung aser jenti ali-i tangtsütsü. Iba anogo nung nenok kiset shiruru chiyimdak tesadem nung chiyimtsü.

²⁴Aser alu alaba nashi pungchi aser gado chanutem jungjunga septetba aser metsü shiokba chiyungtsü achitsü.

²⁵Kodang mitsatem laodir, tetepsetba anogo nung tenem talang shia nung aser ungsem talang shia nung ayongnutem alitsü.

²⁶Ano KIBUBAi pei nübur teyiruba alenteptsüba, aser parnok dak azükba zübu anebtsüba anogo nung ita tesangwa anü sangwa ama, aser anü tesangwaji tenetnü meyong sangwa ama tenet sü agi tesangwaba alitsü.

²⁷Ajiang, KIBUBA tenem talang nungi ain adokba nung arur, mokozü temelem alungba nung alur, pa tebang mechi mit agi sünger, aser pa temeli temeyokba milak ama lir.

²⁸Pa tangu sashiba tzümetsüng ama tekong tonga atua, tesamatsüba süngku agi kintem senzüktsü, aser tesamaleni anitsü asoshi nisungtem tebang nung tanishiba lisü ka alitsü.

²⁹Saka nenok asoshibo temeshi benjong akaba aonung ama, aser KIBUBA, Israel Lung dangi aotsü jemji bener temulungjang pelaseta apusoa aoba ama, ken ka alitsü.

³⁰Kechiyong KIBUBAi pa sentsüwangshi ola angashidaktsütsü, aser tetsübutsü ain adokba nung, aser milak mepet aoksa süshia aoba, tzünglu yipru aser rürlong aluba rongnunga pa teben aluba agütsü.

³¹Kodang KIBUBAi ajok agi zükdir, KIBUBA ola angashia Asiria tetsübu aser taoksa agi atongtsü.

³²Aser tazükba ajok agi azükba shia, koba KIBUBAi parnok dak azüker, asüm aser tawaba kongki ola anidaktsü, aser tongbang anokshidaktsüba agi pai parnok den raratsü.

³³Kechiyong alemli nungi tarongdak ka renema ataloka lir, hau, iba chuba asoshi renema lir, pai tarok aser tesadem yanglua lir, iba anangbaji mi aser süng jenti; KIBUBA tangu sashiba mitsüktsü mozü ayong mesüka mi jangrua lir.