Read njo ISAIA 32 Bible Online

ISAIA 32 - njo bible

ISAIA 32

¹Ajiang! Chuba kati temeshiba nung chubatsü, aser chuba chirtemi ochi agi yimsü asütsü.

²Aser parnok nisung shia mopung nungi tatsükokdak, yipru nung tejenokdak amai, ali takongdak ayong mesüka, tebelemba lima nung lung tulu akhüm mesüka alitsü.

³Idangji shirnoki angur parnok tenük meshibangtsü, aser shirnoki angashir parnok tenarong tena alitsü;

⁴teyilunger mulung nung tangatetba shisatsü alitsü, aser o reptaka jembir temeli agi jangja-a jembitsü karatsü.

⁵Joko tamashir dang tamarener ta majatsü, mesüra ochi mashir dang tulur ta majatsü.

⁶Kechiyong tamachi nisungi tamachi agi jembitsü, aser pa mulung nung tamajung tasa asatsü, Tsüngrem metsübuba mapa inyaktsü, aser KIBUBA indang tiyazü ashitsü, tayar tip metemi toktsütsü, aser tzüraseta alir nungi tajemtsü rakzükadoktsü.

⁷Ochi mashir osetji tamajung lir, tiyazü o agi ajemalur samatsütsü, tanüngeri shitak jembidangaka, pai tamajung tasa asar.

⁸Saka tejungnü nisungi tejungnü mapa asameyanger; aser tejungnütsü mapa nung pei jenjang ayur.

⁹Nenok satoksatoka aliba tetsürtem, aramesoang, aser kü ola angang; nenok mekümdangba jalatem, kü o jembiba nung tenarong tenang!

¹⁰Küm ka lir anogo aika nenok timatemtsü, nenok mekümdangba tetsürtem; kechiyong tsükmenatzü lu nung tejang matangtsü, aser kecha mebendentsü.

¹¹Atentenang, nenok sadok sadoka aliba tetsürtem; atentena liang, nenok mekümdangba purtem; sü endokang aser nenok sasa mangsa kümang; nenok teperem nung anem sü agi nangri kangang!

¹²Alu tajung asoshi aser tejang atangba tsükmenatzü asoshi nenoki mang yima teku nung tsüngang;

¹³kechiaser kü nübur linük nung ayidong aser ai adoktsü, aser pelaseta aliba yimti nung tepela ki ajak asoshi!

¹⁴Kechiyong chuba ki toktsütsü aser nisung jenti aliba yimti senzüka toktsütsü; tenem aser mitkar semtu teti asoshi, arem gadotem pelatepdak, shiruru telok chiyimdak atema tamungdak akümtsü.

¹⁵Temalen nungi asen madak tanela memeküploktsü tashi; aser aremji tejang tangtsüba alu mekümdaktsü tashi, aser süngjang atangba luji arem min masü tashi aji oda alitsü.

¹⁶Idangji arem nung obendangba alitsü, aser temeshiba tejang atangdak alu nung alitsü;

¹⁷aser temeshiba mapa nungi adokbaji tesünep alitsü, aser ochiba nungi adokbaji teti asoshi ajemajema aliba aser tamang katetba alitsü.

¹⁸Aser kü nübur sünep sünepa alidak, tekümzükdak aser tesüngjem anisüngzükdak alitsü.

¹⁹Saka arem lenreptsü, aser yimti teraksa yutsütsü.

²⁰Nenok shirnoki tzü ajak anasa metsü proker, aser nashi pungchi aser gado tetsüng yoker temoatsüba lir.