Read njo ISAIA 33 Bible Online

ISAIA 33 - njo bible

ISAIA 33

¹Na teraksatsür nisung, na meraksatsüi liaka, rakzükraktemer nisung, shingaia na rakzükraktem mesüaka, na aiatai! Nai raksatsüba tatem kümer külenbo, na raksatsütsü, aser na rakzükraktemba nung aniseta kümer külenbo ne dak rakzükraktemtsü.

²Oh KIBUBA, onok dang aochiangma! Onoki na asoshi ata-a liogo. Anepdang shia na onok asoshi tepen, aser timtem mapang nung na onok tekümtet sangma.

³Rongrongshishiba ola angashia nisungtem ajener, ne sasa na aramesodang kintem prokshir.

⁴Aser ne temakzükba osettem lungbeni bendenba amai bendentsü. Süngkutemi joka aoba ama parnoki iba manung jokshishitsü.

⁵KIBUBA ulua lir, kechiyong pa temalen alir; pai Zion ochiba aser temeshiba agi süngdakja lir;

⁶aser tekümtet, shisatsü aser temetetba shisatsü ne mapang nung akang akanga alitsü. KIBUBA tsübubaji pa rongsen lir.

⁷Ajiang! parnok temerangertemi moapu nung ayimtener, tesünep indang o tongtartem kanga ajeber;

⁸lentongbangtem sentoka lir, aser aenlen jajar nisung anena lir; pai tezüngzüktepba raksaogo, pai nisung mezüngmeshir.

⁹Alimai mang ayimer aser jebteper, Lebanon akseta lir aser azüla-a aor; Sharon arem ama küma lir, Bashan aser Karmel to maket lir.

¹⁰“Tang ni aramesotsü” ta KIBUBAi ashir. “Tang ni temaleni atutsü, tang ni kü sasa ajungkettsü!”

¹¹Nenok tsüksü abentsü, nenoki motembang adokdaktsütsü, nenok tangulaji nenok meyoktsüba mi lir.

¹²Aser nisungtemji shinü arongba ama, ayi lepsüker mi nung arongba ama alitsü.

¹³Ni kechi inyaka ali, nenok talang nung alirtem, angang; aser nenok ana nung alirtem, kü tashi metetang.

¹⁴Zion nung temenenpur tetsübu lir, Tsüngrem metsüburtem tatenten agi tongogo. “Asenok rongnung aliba temeyokba mi den shiba alitsü? Asenok rongnung shiba teti jangrua aliba milak den alitsü?”

¹⁵Shibai ochishia jajar, aser indang indanga jembir, shibai pi külakokja anguba tajangzük sempar, shibai süpokrem magizüktsü teka rüktoker, shibai azü tokshiba mangashitsü tenarong tangpanger, aser tamajung dak mereprangtsü pei tenük amuadoker,

¹⁶pa temalen alitsü, pa kümdanga alibaji lung mitsa alitsü; pa chiyungtsü pa nem agütsütsü; pa tzü shitak alitsü.

¹⁷Ne tenük agi chubaji pei tobur tajung nung angutsü; parnoki alima talang nungi reprangtsü.

¹⁸Tetsübutsü taoksatsü madak ne mulungjang shisadangtsü “Shibai züngdanger pa kong ali, shibai alimelen odanger pa kong alir” Shibai lungki odangogo pa kong ali?

¹⁹Temeli reptaka oda nai mangatettsüsa jembiba nai mangajemtsüsa aroka jembiba nübur, tetsübutsü nübur nai mangutsü.

²⁰Asen benjongbentsü sentepdak, Zion yimti dak reprangang; ne tenük agi Yirusalem angutsü, ajem ajema aliba ki, marakzütetba süki, koba tasongtsü kodang matsütettsü, mesüra iba lisü kodanga metokdangtsü.

²¹Kechiyong yangji ayong tulu aser ayong tila alidak, KIBUBA akhüm tulu nung asen asoshi alitsü, iba manung rong kecha rongitsü agi maotsü, mesüra rong tulu jagi süia maotsü.

²²Kechiyong KIBUBA asen o bendangsang, KIBUBA asenok nem ozüng agütsüsang, KIBUBA asen chuba lir, pai asenok kümzüktsü.

²³Ne sendakba lisü sala-a lir; iba jagi rong tongshi tetsünglanglen tashi meitdaktsütet, iba jagi rong aniba süji mesalatet. Idangji tetepsetba shi aser temakzükba oset jenti shilem agitsü, aser tsüngtsükeri temakzükba oset tajung rakzüktsü.

²⁴Yangji alir shingaia, “Ni shiranger ta mashitsü, kechiyong par nübur ajak temenen tatok agütsür alitsü.”