Read njo ISAIA 34 Bible Online

ISAIA 34 - njo bible

ISAIA 34

¹Nenok kintem anasa arung; nenok nüburtem, tenarong tenang aser angang; ali aser yangji sünga aliri angang.

²Kechiyong kin ajak anema, aser parnok temeranger telok anema KIBUBA ain adokba aser mit adoka alir; pai parnok sashia samatsüogo, pai parnok tetepsettsü bendanga agütsüogo.

³Parnok tetepsetba endokadoktsü, aser parnok tasü mang teshinem adoktsü, aser parnok zü tenem nung yimshitsü.

⁴ Aser anüng nung petinu ajak ajasa aotsü, aser anüngtem shiküp kaket ama lungtenadoktsü, aser tsükmenatzü dong nungi to ajetba ama, aser munguzünu dong nungi to ajetba ama item petinu ajak aremtsü.

⁵ Kechiyong kotak nung kü nok ain adokba agi sünga kümogo; ajiang! Edom madak aser kü atakatemba nübur madak o bendangtsü aji alutsü.

⁶KIBUBA nok azü agi süngogo, aji temo agi san chanu aser nabong zü agi, san tezüngjang temo agi mezübanga lir; kechiyong Bozra nung KIBUBA tetepsetba tenla aser Edom lima nung jenti tetepsetba lir.

⁷Arem nashi pungchi tejebketbatem den, aser nashi pungchi chanutem den laotsü; aser parnok lima azü agi lokjemtsü, aser parnok temo ali agi mezübangtsü.

⁸Kechiyong ibai KIBUBA mangyangba anogo, Zion den raraba nung meyipa shilangtsüba küm lir.

⁹Aser yangji aliba ayongtem süngnaktzü mozü aser iba linükji jangrua aliba süngnaktzü mozü akümtsü.

¹⁰Anüngdang saka aonung saka aji maseptsü; iba mokozü teti longa atutsü; putusa putu aji endoka alitsü; shinga ibaji ajanga mesüitsü.

¹¹Saka mongzü aser jepju talidak asütsü; aser iba nung pokpo aser waro alitsü; aser iba manung KIBUBAi temakmaktsü aser tazüngla kümdaktsüba tasadangba lisü mesangtsü.

¹²Iba dangji parnoki chuba yimli ta ajatsü saka chuba chir ajak kecha makümtsü.

¹³Iba chuba kidang ai meitsü, aser iba mitsa nung temungtsü aser ayidong meitsü, aser aji tzünü amungdak aser ostrich ozü alidak asütsü.

¹⁴Aser lisem lima arem shirurutemi tsünü aser nabong tepung den ajuruteptsü aser pei medemer dang ayimtentsü, hau, ammang shiruru tamajung yangji alitsü, aser anisüngzükdak angutsü.

¹⁵Aser yangji pokpoi la tesep yanglua, entsü koa aser techanu rizüka la akhümpok nung anitentsü, hau, yangji hogon senteptsü, aser pei medemer den alitsü.

¹⁶Nenoki KIBUBA kaket nungi bushiang aser züngang; item kata züdoka malitsü; kechiyong KIBUBA tebang agi temelaba agütsüogo, aser pa tanelai parnok sentepdaktsü.

¹⁷Aser pai parnok asoshi an tokdang, aser pa teka agi parnok nem lisü agi asazüktsüogo, parnoki aji teti agitsü, putusa putu yangji parnok alitsü.