Read njo ISAIA 35 Bible Online

ISAIA 35 - njo bible

ISAIA 35

¹Azüngmeyak aser ali takong linüki pelateptsü, aser lisem limai pelateptsü aser golap naro ama pungyatsü.

²Aji talubosa pungyatsü, aser oda kentenba ola agi pelateptsü; Lebanon sentsüwangshi, Karmel aser Sharon akhüm iba nung agütsütsü; parnoki KIBUBA sentsüwangshi aser Tsüngrem akhüm tulu angutsü.

³ Nenoki tashi mait teka tashi itdakjang, aser tashi mait temokok akang akanga kümdakjang.

⁴Shir mulungjang tataseta ali parnok dang, “Tashi itang, tetsübu, ta shiang; ajiang nenok Tsüngrem mangyangba den Tsüngremi meyipa agütsütsü arur; pa arutsü aser nenok kümzüktsü.”

⁵ Idangji nükpoker tenük lapoktsü, aser narongjaker tenarong lapoktsü.

⁶Idangji tsüngtsüker nisungi mesü ama pungtentsü aser suwar temeli-i ken atentsü; azüngmeyak arem nung tzü, aser lisem lima nung ayongtem adoktsü.

⁷Aser merük merüka aliba lisemi moti akümtsü, aser tzüraseta aliba ali agi tzü ayimba ayong akümtsü. Shirongtem alidak kong parnok amunger tzütok aser ai adokdak alitsü.

⁸Yangji lentongbang, aser lenmang ka alitsü, aser iba dang, “Temeshiba Lenmang” ta ajatsü; memerükeri iba lenmang ajanga mesüitsü, saka aji pei nübur asoshi alitsü, tamashi nisung shinga yangji menemzütsü.

⁹Yangji molusongzü kecha malitsü, mesüra iba madaki tetepsettsü jangraba shiruru kecha matutsü, parnok yangji mamungtsü; saka alangzükba pur yangji jajatsü.

¹⁰KIBUBA alangzükba pur meyipa arutsü, aser ken tena Zioni arutsü, aser teti tatem maka tepela parnok kolak manung alitsü; parnoki tepelatsü aser temulung tepela aser pelaba angutsü, aser tejashi aser temulung shisa amsaba jena oadoktsü.