Read njo ISAIA 36 Bible Online

ISAIA 36 - njo bible

ISAIA 36

¹Hezekia chuba küm terpezübuba nung, Asiria chuba Sennakeribi atsüdanga aliba, Yihuda yimti ajak anema atu, aser itemji agi.

²Aser Asiria chubai Lakhis nungi Rabshaki Yirusalemi Hezekia chuba dangi yok; aser pai süshir li lenti tongbang manung, tzü mesü dak temaba moti anasa noktak.

³Idangji chuba kidang ketdangpur Hilkia jabaso Eliakim, tezüluba Shebna aser putipuyang zülur Asaf jabaso Yoa pa dangi aru.

⁴Idangji temeranger tanishisangi parnok dang ashi, “Nenoki Hezekia dang shiang, ‘Yamai, Asiria chuba, chuba tului ashir, kechi nung temulung lemer na tamang akar?

⁵Rara asoshi o kisüngji tasa aser tashi ta nai bilem asü? Shiba dak metaloker nai ni anema apuso?

⁶ Ajiang, iba tzütok tenenrep, Ijip, koba manung nisungi metalokra pa teketi aji aitsü aser tupoktsü iba madak nai tamang akar. Yamaji Farao, Ijip chuba, pa dak tamang akar ajak dang lir.’

⁷Saka nai kü dang, ‘Ozü Tsüngrem KIBUBA dang onoki tamang akar’ ta shira, Hezekiai pa temeshi dak aser tenla dak bener oa alidang Yihuda aser Yirusalem dang, ‘Nenoki iba tenla dak madang külemtsüla, ta ashiba pa masü no?’

⁸Anungji tang ni ne dang mepishir, Kü kibur Asiria chuba nem tenangzükba agüjang, aser ni ne nem kor meyi ana, nai dang parnok dak tamarenertem mendaktsütsü kokdi süra, agütsütsü.

⁹Ajangla, nia talungtsü aser kor temeranger asoshi Ijip dak tamang ka-a ali nung kodaser nai kü kibur tenzüker tilatiba rongnung arkotong ka tejak meyipa yoktettsü?

¹⁰Aser tang KIBUBA medeni iba lima samatsütsü nai atu asü? KIBUBAi kü dang ashi, ‘Iba lima anema tuang, aser aji samajang.’ ”

¹¹Idangji Eliakim, Shebna aser Yoai Rabshak dang ashi, “Ni ne dang mepishir, ne tenzükertem dang Siria nunger o nung jembiang, kechiyong aji onoki angateter; aser jara nung aliba nüburi angashia onok dang Yihuda o nung tejembima.”

¹²Saka Rabshaki ashi, “Kü kiburi item o ne kibur dang aser ne dang jembitsü ni yok asü? Jara manung mena alir dangi parnok pei scü achitsü aser pei natzü ajemtsü pai ni meyok no?”

¹³Idangji temeranger tanishisangi noktak, aser Yihuda o nung ayimtena ashi, “nenoki Asiria chuba, chuba tulu o angang!

¹⁴Yamai chubai ashir, ‘Hezekia nem nenok tashiokdaktsü;

¹⁵mesüra KIBUBAi atangji asenok kümzüktsü; iba yimti Asiria chuba ket nung magütsütsü, ta shia Hezekiai nenok KIBUBA dak tamangdaktsü.’

¹⁶Hezekia o tanga; kechiyong Asiria chubai yamai ashir, ‘Nenoki kü den yimjung yangluang aser kü dangi adokang; aser nenok nisung shia pei pei tsükmenatzü, aser nisung shia pei munguzünu achitsü aser nenok nisung shia pei tzübu nungi tzü jemang;

¹⁷ni arua nenok alinük pei lima ama kati, tsük aser yi aliba lima, chiyungtsü aser tsükmenatzü lu aliba limai nenok anir mao tashi chiang aser jemang.

¹⁸KIBUBAi asenok kümzüktsü ta shia nenok Hezekiai mesüzüka lir kümdangang. Asiria chuba ket nungi kintem tsüngrem kari pei linük kümzük asü?

¹⁹Hamat aser Arpad tsüngremtem kong ali? Sefarvaim tsüngremtem kong ali! Kü ket nungi parnoki Samaria kümzük asü?

²⁰Item linük tsüngrem rongnung pei linük kü ket nungi kümzüka aliba, oda KIBUBAi kü ket nungi Yirusalem kümzüktsüsa shibasa ali?’ ”

²¹Saka parnoki ola madoki ali aser pa dang o kata melangzü; kechiaser chubar temelabaji, “Pa dang kecha telangzü” ta shia liasü.

²²Idangji Hezekia jabaso ketdangpur Eliakim, tezülur Shebna, aser putipuyang zülur Asaf jabaso Yoa parnok süoshi shisar Hezekia dangi aru, aser pa dang Rabshak o ajak ashi.