Read njo ISAIA 37 Bible Online

ISAIA 37 - njo bible

ISAIA 37

¹Hezekia chubai aji angashi dang pai pei süoshi shisa, aser pei sasa anemsü abener KIBUBA dangi ao.

²Pai chuba ki ketdangbuba Eliakim, tezülur Shebna aser putir tamburtem anemsü abener Amoz jabaso Isaia dangi yok.

³Aser parnoki pa dang ashi, “Yamai Hezekiai ashir, Timtemtsü, tarütsüba aser maksütsü anogo ibai lir; kechiyong tanurtem nusotsü mapang, saka sotsütsü tashi mali.

⁴Ashiko KIBUBA ne Tsüngremi temeranger tanishir shiba Asiria chubai taküm Tsüngrem sensatsütsü yok, pa o angashitsü, aser KIBUBA ne Tsüngremi angashiba otem arütsütsüa kar. Anungji tanüngba nübur asoshi ne sarasademba yokang.”

⁵Anungji Hezekia chuba tenzükertem Isaia dangi aru,

⁶Isaiai parnok dang ashi, “Yamai nenoki nenok kibur dang shiang, ‘Yamai KIBUBAi ashir, Ni angashiba o koba agisa Asiria chuba tenzükertem ni atalatsü aji tsübua teli.

⁷Ajiang, ni pa dak tanela ka enoktsütsü, aser pai olulu ka angashitsü, aser pei limai meyipa aotsü, aser par lima nung ni pa nok agi südaktsütsü.’ ”

⁸Anungji temeranger Rabshak telok meyip aser Asiria chubai Libna anema raraya angu; kechiaser Lakhis nungi pa pilaogo ta pai angashi.

⁹Aser Ethiopia chuba Tirhaka indang, pa anema raratsü adoka lir, ta shia pai angashi. Aser pai aji angashidang, pai Hezekia dangi osang abener yoka ashi,

¹⁰“Yamai nenoki Yihuda chuba Hezekia dang shiang, ‘Ne Tsüngrem shiba dak nai tamang akar, Yirusalem Asiria chuba ket nung magütsütsü’ ta shia na tashiokdaktsü.

¹¹Ajiang, Asiria chubatemi alinük ajak dang, meshi meshia samaja kechi inyak nai angashiogo; aser na kümzüktsü asü?

¹²Kintem tsüngremtemi kü tsüraburtemi samatsüba, oda Gozan, Haran, Rezef aser Talessar nung aliba Eden chirtem, parnok kümzük asü?

¹³Hamat chuba, Arpad chuba, Sefarvaim yimti chuba, Hevna aser Ifaa chuba kong ali?”

¹⁴Osang abener ket nungi Hezekiai shitiji agizük, aser aji azüng, aser Hezekiai KIBUBA dangi atu, aser aji KIBUBA madang lemdaka ayu.

¹⁵Aser Hezekiai KIBUBA madang sarasadema ashi,

¹⁶“Oh Temeranger Telok KIBUBA, Israel Tsüngrem, shiba cherubim manung mena alir, na Tsüngrem, oda na mesüng, alima yimti ajak madak lir, anüng aser ali nai yanglu.

¹⁷Ne tenarong tenjang, Oh KIBUBA, aser angang; Oh KIBUBA ne tenük lapokangma aser reprangang; aser taküm Tsüngrem sensatsüba, Sennakerib otem angang.

¹⁸Atangji KIBUBA, Asiria chubatemi kin ajak aser parnok lima raksaja lir,

¹⁹aser parnok tsüngremtem mi nung enokja lir; kechiyong parnok tsüngrem masü, süng aser lung; anungji parnoki itemji samatsü.

²⁰Tang anungji, Oh KIBUBA ozü Tsüngrem, alima yimli ajaki KIBUBA na oda na dang ta metettsü asoshi pa teka nungi onok kümzükangma.”

²¹Idangji Amoz chir Isaiai Hezekia dangi yoka ashi, “Yamai KIBUBA, Israel Tsüngremi ashir, Asiria chuba Sennakerib anema nai kü dang mepishi nungji,

²²KIBUBAi pa anema jembiba oji ya lir: Zion jala aiüri na sensatsüogo aser na atala-a menütsüogo. Yirusalem jalai pei tekolak ne dak angemloktsüogo.

²³Nai shiba mezüngmeshitsü aser atalatsü? Shiba anema nai ola adok aser ne tenük temaleni yok? Oda Israel Temeshisang anema liasü.

²⁴Ne tenzükertem agi nai KIBUBA sensamasatsü, aser ashi, ‘kü talungtsü telok den ni Lebanon telungtiba tonga tenem azükleni atua lir; yangji cedar süngdong talangji, aser fir teshimtet süngdong lensüktsü; aser iba tezülen talangi, par tejang atangba moapui aitsü.

²⁵Ni ali atu aser tzü ajem, aser kü tetsüng temupu tetsüng telung jagi Ijip ayong ajak kongdaktsütsü.’ ”

²⁶“Akhidang aji ni koda inyak aser alemli koda tasa asa aji nai mangashi no? Tang kechi ni atalokdaktsü aji ni alemli asateta liasü, anungji ne atsüdanga aliba yimtitem raksaba telong kümdaktsütsü ni aji atalokdaktsütsü.

²⁷Anungji yangji alir tashi tila liasü, parnok bangka aser süngmangteper; parnok moapu nung ai ama aser süngolio lanu ama aser alu nung mo tashi ita makümdang ama liasü.

²⁸Na shishiba aser amenba, na aoba aser aruba aser ni anema ain adokba ni metet.

²⁹Nai ni anema ain adok nungji aser ne mezümekümba kü narongi ai nungji, ni kü poroki ne teni nung, aser ne tebang mechi nung kü lakem enoktsütsü, aser na koba lenmangi aru iba lenmangi ni na meyipa odaktsütsü.”

³⁰Ibai na asoshi temaitsü alitsü: Taküm küm pei sasa kechi meidir aji nenoki achitsü aser tanabuba küm nung kasa nungi adokbajisa, aser tasembuba küm nung, nenoki metsü prokang, alu ruang, aser tsükmenatzü lu yimang, aser iba süngjang chiang.

³¹Yihuda kidong jenbua anünga aliba tanaben telunglen tera ayangtsü aser temaleni süngjang atangtsü;

³²Kechiyong Yirusalem nungi tanüngba, aser Zion tenem nungi jentetba telok ka adoktsü Temeranger Telok KIBUBA tejangraba agi ibai inyaktsü.

³³Aji asünung KIBUBAi Asiria chuba indang yamai ashir, “Pa yimti jagi marutsü, mesüra lijakjang kata meyoktsü, mesüra iba madangi pa jong apunger marutsü, mesüra ali mejungketa iba anema meyanglutsü.

³⁴Pa aruba lenmangisa pa meyipa aotsü, aser iba yimti-i marutsü” ta KIBUBAi ashir.

³⁵“Kechiyong ni atema aser kü tenzüker Dawid atema yimtiji noktangtsü aser kümzüktsü.”

³⁶Idangji KIBUBA tenyar ao, aser Asiria nunger tanendak meyi noklang ka ser tir pungu tepset; aser kodang nisungtem anepdang saak, ajiang, parnok ajak tasü mang liasü.

³⁷Anungji Asiria chuba Sennakerib apuso aser meyipa oa Ninevi nung ali.

³⁸Aser ya adok, pa tsüngrem Nisrok kidang pai külema alidang, par jabasotem Adrammelek aser Sharezer tenati nok agi pa tepset; aser parnok Ararat limai ajen. Aser par chir Esarhadon pa melen chuba.