Read njo ISAIA 38 Bible Online

ISAIA 38 - njo bible

ISAIA 38

¹Item anogo nung Hezekia tasütsüsa shirang. Aser Amoz chir Isaia ainkar pa dangi aru, aser pa dang ashi, yamai KIBUBAi ashir, “Ner ki tiptema yuang, kechiyong na asütsü, aser taküm malitsü.”

²Idangji Hezekia tejak jara tsütsü meyip aser KIBUBA dang sarasadema ashi,

³“Oh KIBUBA, ni ne dang mepishir, ni ne madang ochi nung aser temulungjang tindang agi jaja, aser ne madang kechi tajung aji inyak aji tang bilemtetangma.” Aser Hezekia kanga ajeb.

⁴Idangji KIBUBA O Isaia dangi ya oda aru.

⁵“Oang, aser Hezekia dang shiang, yamai KIBUBA nebu Dawid Tsüngremi ashir, Ni ne sarasademba angashiogo, ni ne nüktzü ayimba nguogo; ajiang, ni ne arishi küm terpungu enloktsüogo.

⁶Aser ni na aser iba yimti Asiria chuba ket nungi kümzüktsü; aser iba yimti ni noktangtsü.”

⁷“KIBUBAi jembiba ama pai inyaktsü na asoshi KIBUBA nungi ibai temaitsü alitsü.

⁸Ajiang, anü tao akhüm Ahazer jenjang manung tongloktsübaji tanaben meyipa jenjang ter ni arudaktsütsü.” Anungji anü tanela akhüm lua ibaji jenjang ter meyipa arudaktsü.

⁹Yihuda chuba Hezekia, pa shirangba aneber züluba:

¹⁰Ni ashi, kü anogotem anjongmeshi nung ni Sheol kümbangi aitsü; kü anünga aliba arishi küm kü dak nungi agien.

¹¹Ni ashi, KIBUBA, oda KIBUBA ni akümlir lima nungbo mangutsü. Ni joko alima nung alir rongnung nisung dak mereprangtsü.

¹²Kü talidak, sannüker süki ama kü dak nungi agienogo; sütakeri ama pai kü taküm atsütena ayu. Apama nungi pai ni rongtokadoktsü. Anüngdang aser aonung pai ni taküm temdaktsütsü.

¹³Anepdang tashi ni kü sasa tanemi shisadang; molusongzüi ama pai kü teret ajak raksatsür; anüngdang nungi aonung tashi nai ni taküm temdaktsütsü.

¹⁴Molulem mesüra tzü ozü amai ni asa; posüi ama ni mang ayim; kü tenük temalen reprangba agi metizüker. Oh KIBUBA, ni kangshir, na kü jenokdak sangma.

¹⁵Ni kechi ashitsü? Pai kü dang jembi aser pa sasa inyak; kü nela timatemba yong kü arishi tepiyong ni tanemi aotsü.

¹⁶Oh KIBUBA, item mapa agi nisungtem alir, aser item ajak ajanga kü taküm tanela sota lir. Anungji nai ni tanaben anebjang aser ni taküm lidakjang.

¹⁷Ajiang! Ni ajungtsü atema ni timtem tulu angur; saka nai temeim agi kü nela tesamatsü kangla nungi kümzük. Kechiyong nai kü menen ajak ne tesüleni endok.

¹⁸Sheoli na asangtsü makok, aser tasübai na sanga amungtsü makok. Shirnoki kanglai alur parnoki ne ochiba asoshi meimlatet.

¹⁹Akümlir, akümliri ni tanü inyakba ama na asangtsü. Tsüraburi pei chirtem dang ne tamang katetba indang ashitsü.

²⁰Ni kümzüktsü KIBUBA renema lir. Anungji KIBUBA kidang asen taküm tepiyong lisü kongki agi asenoki ken atentsü.

²¹Tang Isaiai ashi, “Parnoki munguzünu amtsük ka agir aji tepzünu nung neplokang, aser pa anebtsü.”

²²Hezekiai ano ashi, “KIBUBA kidangi ni atutsü kechi temaitsü alitsü?”