Read njo ISAIA 40 Bible Online

ISAIA 40 - njo bible

ISAIA 40

¹“Sünepjang nenoki kü nübur sünepjang” ta nenok Tsüngremi ashir.

²“Yirusalem temulungjang tonga nenoki jembiang aser la tenzükba mapang temogo, la tai menaba tai tokogo, aser la temenen ajak asoshi anasü KIBUBA ket nungi pai agizüka lir ta la dang shiang.”

³ Kati ayimtenba ola, “Nenoki arem nung KIBUBA lenmang renemang, lisem lima nung asen Tsüngrem asoshi metong metonga lentongbang yangluang.

⁴ Lenten ajak ajungkettsü, aser tenem aser ungsem ajak aludaktsütsü; aser tekirak metong metonga akümtsü, aser keprangkepro tesüsü kümdaktsütsü;

⁵aser KIBUBA sentsüwangshi jungkai adoktsü aser aji shi ajaki külemi angutsü; kechiyong KIBUBA bang agi aji jembiogo.”

⁶ Ola kati ashi, “Ayimtenang” aser ni ashi, “Ni kechi ayimtentsü?” Shi ajak ai lir, aser iba ajungbaji moapu nung naro ama lir.

⁷Ai azülar, naro aremer; kechiaser KIBUBAi tangu agi iba manung apuoktsür, atangji nisungtem ai lir.

⁸Ai akonger, naro azülar; saka Tsüngrem O bo teti alitsü.

⁹Oh Zion dang osang tajung ashiba na tenem talangi tuang: Yirusalem dang osangtajung ashiba, Oh na, ne ola tashi agi yokang; ola ajungketang, tsübua teli. Yihuda yimtitem dang “Nenok Tsüngrem ajiang” ta shiang.

¹⁰ Ajiang, KIBUBA Tsüngrem tashi tait ama arutsü, aser pa asoshi pa ket agi yimsü asütsü, pa tajangzük pa den lir, pai meyipa agütsüba taa pa madang lir.

¹¹ Pai pei san telok sannükeri ama mesütsü, aser pai pei tepen agi san chanutem anitentsü, aser pai itemji teku nung ajunger, aser mama yongdaktsürtemji tanemi anir aotsü.

¹²Shibai pa kabu tarok nung tzütem asadang, aser anüng am agi asadang; aser alima nung ali auyi agi tatakzük ka nung jungjunga meteta lir, aser tenemtem seret jungjunga meteta lir, aser tenemtem seret dong nung odang, aser ungsem seret nung odang?

¹³ Shibai KIBUBA dang shisa tajung agütsür küma pa dang sayu aser pa tanela ajongmeso?

¹⁴Shiba dang nungi pai shisatsü agi, aser shibai pa dang sayu, aser shiba temetetba shisatsü, aser tangatetba lenmang pa dang sayu?

¹⁵Ajiang! Kintem tzüshi nung tzüjang ka ama lir, seret dong nung auyi tila ka ama parnok züngshir. Ajiang, asetkongtem pai oset kanga tila ka amai ajongmeso.

¹⁶Lebanon süng tatsüktsüji teperi masü, mesüra iba shirurutemji tarongba tenla asoshi teperi masü.

¹⁷Aser pa madang kin ajak kecha masü amai lir. Pa madang parnok kecha makaba tazüngla aser amajok ta züngshir.

¹⁸ Ajangla nenoki Tsüngrem shiba den medemdangtsü mesüra pa kechi mesük aji nenoki koma medemdangtsü?

¹⁹Süngyanglu yanglubaji mapa inyaker nisungi aji yimsatsüba lir, aser hon yintsüngeri iba manung hon yangloktsür, aser taribi yinzü agi sentaker.

²⁰Iba ama tenla agütsütsü shiba kanga sensaktena lir pai shizüka maotsüba süngdong shimer; idangji pai pei asoshi süngyanglu noksa marakzüi ataloka ayutsü tesangra mapa inyaker nisung bushir.

²¹Nenoki memetet no? Nenoki mangashi no? Tetenzük nungi nenok dang mashi no? Lipok nungi nenoki mangatet no?

²²Aji alima tenari temalen amensang pasa lir, aser yangji aliba nisungtem süngku amai lir; pai anüngtem teyindangba sü amai atsülangdaktsür, aser süki amai telunglen alitsü sübanga yutsür;

²³Oda tamarenertem kecha mekümdaktsür; alima obendangertem pai amajok kümdaktsür.

²⁴Parnok jungjunga matem; hau, parnok jungjunga meprok, hau, parnok tedong jungjunga ali nung tera mayang: kodang pai item madak tangula apuloktsür, parnok azülar, parnok aser tsüngrem mopungi mo tembang ama parnok bener aor.

²⁵Ajangla, kü den saku asütsü nenoki ni shiba den medemdangtsü? ta Temeshibai ashir.

²⁶Nenoki tenük temaleni ranglokang, aser reprangang! Itemi shibai yanglu? Shibai parnok temeranger telok anitet, aser parnok ajak dang tenüng teta pai ajar; pa tashi uluba ajanga, aser pa ain tashi agi kata mesamai lir.

²⁷Kü lenmang KIBUBA nungi miimbanga lir, kü ochiba kü Tsüngrem nungi oda süidaktsür ta, Oh Yakob, nai kechiba ashir, Oh Israel, kechiba jembir?

²⁸Nai memetet no? Nai mangashi no? Teti tatem maka Tsüngrem KIBUBA, alima tatembangtem Teyanglusang, pa melular, aser aniseta malir; pa shisatsü mebushijemtsü.

²⁹Telular nem pai ain agütsür; aser shiba tashi mali pai tashi tali itdaktsür.

³⁰Asangurtem lulatsü aser ania alitsü, aser asangurtema jungjunga laotsü;

³¹saka shirnoki KIBUBA dang ata-a alir parnok tashi tasen angutsü; mongzütem ama tashikang agi atutsü; parnok asümtsü, aser aniseta malitsü; parnok jajatsü, aser melulatsü.