Read njo ISAIA 41 Bible Online

ISAIA 41 - njo bible

ISAIA 41

¹“Oh tzüküm nung alirtem, asetkongtem, kü madang mokorai angang; aser nisungtemi parnok tashi tasen ngudakjang; parnok anasa arudakjang; asenoki külemi obendangba dangi anasa arudi!

²Shibai anüdoklen nungi ka adokdakja pa aolen ochiba agi kokdaktsür pa madang kintem pai agütsür, aser chubatem madak pa nem yimsü südaktsür; pa nok agi parnok auyi ama, aser merepshiaaliba mo tembang ama pa lijak agi kümdaktsür.

³Pa tetsüng mayaokdak parnok arishia lendong makai ajanga aor.

⁴Tetenzük nungi pututem jateta shibai ya sayang aser inyak? Ni KIBUBA, tetenzük aser tatem den aliba pa ni lir.

⁵Tzüküm nung alir angu, aser tsübu, alima tatembangi atenten; anasa parnok ait, aser aru.

⁶Parnok nisung shibai pei kiyonger yari aser nisung shiai pei adianu dang ashi, ‘Pelashishia liang.’

⁷Anungji süng mistri-i hon atsünger ajongshi, aser shibai yintem agi akoshir pai, ya junger ta shia yinsem nung atsüngba nisung ajongshir; aser marakzükdaktsütsü pai aji kojal agi akangdaktsü.”

⁸ “Saka na, Israel, kü tenzüker, Yakob, shiba ni shimtet, Abraham metsü, kü tembar;

⁹ni na alima tatembang nungi bena aru, aser iba kinük nungi na aja, aser ne dang ashi, ‘Na kü tenzüker, ni na shimtet aser na mejendoktsü;’

¹⁰na tetsübu, kechiyong ni ne den lir; tamataria teli, kechiyong ni ne Tsüngrem lir. Ni na tashi itdaktsütsü; hau, ni na yaritsü; hau, ni na kü temeshiba teka tajichi agi ajungkettsü.”

¹¹“Ajiang, na anema ain adoka alirtem parnok aktsü aser süngmangseta alitsü. Ne den shibai toktepdir, parnok kecha makümtsü aser samatsü.

¹²Shirnoki na anema rarabangsentepdir, nai parnok bushitsü, aser parnok mangutsü. Na anema shirnoki raradir kecha maliba ama, aser tazüngla oset ama alitsü.

¹³Kechiyong ni KIBUBA ne Tsüngremi ne dang, ‘Tetsübu ni na yaritsü, ne teka tajichi nung amettsü’ ta ashir.

¹⁴Tetsübu, na mesen Yakob, aser nenok Israel nisungtem; ni na yaritsü ta KIBUBAi ashir, aser na alangzüksangji Israel Temeshisang lir.

¹⁵Ajiang, ni na tepu aketba mo anetba oset techira tasen ka kümdaktsütsü; nai tenem netsatsütsü, aser tila küma tepsatsü, aser ungsemtem tsüksü ama kümdaktsütsü.

¹⁶Nai parnok apshitsü aser mopungi parnok bener aotsü, aser tsüngrem mopungi parnok prokshidaktsütsü; aser nai KIBUBA dang pelatsü, nai Israel Temeshiba dak sentsü wangshitsü.”

¹⁷“Sensaker aser anünga aliri amajok dang tzü bushir, aser tzüraba agi parnok meli konga lir; ni KIBUBAi parnok dang langzütsü, ni Israel Tsüngremi parnok senzüka metoktsütsü.

¹⁸Ni tenem moapu nung ayongtem, aser lenten tiyong nung tzüpokdak lapoktsü; ni ali takongji tzü moti, aser ali takongji tzü apokdak yanglutsü.

¹⁹Ni arem nung cedar, akashia süngdong, aser myrtle, aser totzü süngdong atemtsü; lisem lima nung fir süngdong, mitsüktsü aser Larch süngdong külemi yutsütsü,

²⁰oda KIBUBA tekai ibai inyak aser Israel Temeshibai ya yanglu ta nisungi angutsü aser metettsü, shisadangtsü aser angatettsü asoshi.”

²¹Nenok o bena arua sayuang, ta KIBUBAi ashir; nenok kuli tashi tait bena arung, ta Yakober chubai ashir.

²²Parnok nem itemji bena arudakjang, aser kechi ataloktsüar onok dang metetdakjang; akhi mapatem nenoki metetdakjang, itemji kechi koda onoki metettsü aser item tatembang metettsü asoshi; mesüra tarutsü mapangtem onok dang sayuang.

²³Onoki nenokji tsüngremtema ta metettsü asoshi tarutsü mapatem metetdakjang; hau, onok ratamatateptsü, aser aoksateptsü tajung mesüra tamajung inyakang.

²⁴Ajiang, nenok kecha mali, aser nenok mapa tazüngla lir; shibai nenok shimtetdir paji tesempatsü lir.

²⁵Anüolentip nungi ni ka adokdaktsüogo, aser pa arua lir; anü adokli nungi pai kü tenüng nung ajar; poteperi ajongli ajemshiba ama, pai yimsüsürtem semki dak ama ajemzüka yoktsü.

²⁶Tetenzük nungi onoki metettsüsa, aser mapang matong dang nungi, “Pa temeshiba” ta onoki ashitsüsa shibai aji metetdaktsü? Hau, temetetdaktsüba shinga mali, hau sayutsüngir shinga mali, hau, nenok otem angashir shinga mali.

²⁷Ni aji tamasa Zion dang metetdaktsüogo, aser osangtajung indang osangbener ka Yirusalem nem agütsür.

²⁸Saka item indang shinga mali asü, item indang teshisadanger mali asü, oda ni parnok dang asüngdang dang o kata melangzütet.

²⁹Angang, parnok ajak kecha mali, parnok mapatem tazüngla, parnok temelusaba süngyanglutem mopung aser tendoktsü lir.