Read njo ISAIA 42 Bible Online

ISAIA 42 - njo bible

ISAIA 42

¹ Ajiang, kü tenzüker, shiba ni ajungketer; kü teshimtet, pa dak ni pelar. Ni kü tanela pa dak yutsütsü, pai kintem dangi ochi obendang bener arutsü.

² Pai mayimtentsü, mesüra tashi agi ola magütsütsü, mesüra pa ola yimdong nung mangashidaktsütsü.

³Azüa aliba tzütok kata pai mesükdangtsü, aser mokozü longa ronga aliba lisü kata pai meremseptsütsü; ochi nung pai o bendang adokdaktsütsü.

⁴Alima nung ochi o bendang meyanglu tashi aser tzüyimküm linüktemi pa tesayubatem ata-a mali tashi, pai lula-a makümtsü mesüra tezü matangtsü.

⁵ Tsüngrem KIBUBA shibai anüngtem yanglu aser item ladaka yutsü; shibai alima aser iba nungi adokba prokshia yutsü; aser shibai iba manung nisung nem tangula, aser iba nung jajar nem tanela agütsür, pai yamai ashir;

⁶ Ni KIBUBAi na temeshiba nung aja, aser ne ket nung amettsü aser na nüka alitsü, aser kintem tesangwa asoshi, nisungtem tezüngzüktepba asoshi ne nem agütsütsü.

⁷Tenük tapok lapoktsütsü, tepuokertem kangla nungi, aser shirnok tammang nung tepuokdak ki nung mena ali parnok anitettsü.

⁸Ni KIBUBA lir; aji kü tenüng; kü sentsüwangshi tangar nem mesüra kü tenüngsang süngyanglu nem ni magütsütsü.

⁹Ajiang, taoba mapatem ataloka arua lir, aser ni mapa tasen metetdaktsür; itemji madokdang yongi ni nenok dang item indang ashir.

¹⁰KIBUBA dang ken tasen ka tenlokjang, aser nüngjang tatem nungi pa nüngsanga agüjang; tzüyim aser iba nung alibai arüang, tzüküm limatem aser yangji alibatemi ayimtenang.

¹¹Lisem lima aser yimti nung alirtem, Kedar aliba yimtitemi ayimtendakjang, Sela nung alirtemi ken tendakjang, parnok nem tenem kolak nungi ayimtendakjang.

¹²KIBUBA nem parnoki sentsüwangshi agütsüdakjang, aser pa nüngsang tzüküm linük nung metetdakjang.

¹³KIBUBA Temeranger nisung ama pa mit adoktsü; pai ayimtentsü, hau, pai tashi agi ola agütsütsü; pai pei tzüchirtem anema tashi tulu agi inyaktsü.

¹⁴Ni talangka ajemajema liogo; ni mokorai ali, aser kü sasa titema ali; tang ni tetsür nusoshidang ama ayimtentsü; ni külemi samatsütsü aser meyoktsü.

¹⁵Ni tenem aser ungsemji endoktsü, aser parnok süngolio ajak kongdaktsütsü. Ni ayongtemji asetkongtem kümdaktsütsü aser tzübuji kongdaktsütsü.

¹⁶Nükpokertem parnoki memetetba lenmangi ni bener arutsü; parnoki memetetba lenmangi ni parnok anitsü; parnok jakdang tammangji ni tesangwa kümdaktsütsü, aser tekirak temetong kümdaktsütsü. Itemi ni inyaktsü, aser ni itemi meinyaki metoktsütsü.

¹⁷Süngyanglu noksa dak temulung alemba aser mulusa-a yanglutetba süngyanglu noksa dang, “Nenok onok tsüngrem” ta ajartem parnok meyipdaktsütsü, aser parnok maksü tuluka angutsü.

¹⁸Angang, nenok tenarong tajaktem; aser reprangang nenok nükpokertem.

¹⁹Shiba tenük tapok, saka kü tenzüker mesüra ni yokba kü osang abener ama, shiba tenarong tajak lir? Shiba kü den tesünep nung ali pa ama shiba tenük tapok? Aser KIBUBA tenzüker ama tenük tapok shiba lir?

²⁰Nai aika angur saka nai mebenshir; tenarong lapoka lir, saka nai mangashir,

²¹pei ozüng tamaren aser sentsüwangshi kümdaktsütsü asoshi, KIBUBA pai temeshiba atema pela-a liasü.

²²Saka ibai rakzükdaktsüba aser raksatsüba nübur lir; parnok ajak tapok nung sang soa yuja lir, aser tepuokdak ki nung parnok atsüka lir; parnok tetepsettsü asoshi lir, aser shingaia mekümzüker, terakzükdaktsütsü asoshi yanglushidakjang ta ashir shinga mali.

²³Nenok rongnung iba nung tenarong atentsü, tarutsü mapang asoshi angatsü aser angashitsü shiba lir?

²⁴Shibai Yakob makzükdaktsü aser Israel rakzükraktemdaktsü? KIBUBAi masü no? Pa shiba anema asenoki temenen mena, aser pa lenmangtem nung parnoki, mejajali asü, mesüra parnoki pai sayuba tashi manga.

²⁵Anungji pai parnok dak pa ain adokba mit aser tongbang raraba tashi meküploktsü; aser aji parnoki mangatetaka ibai agi parnok meketa mi kaodaktsü; aser aji parnok mulungjang nung meyuaka, parnok rongtoktsü.