Read njo ISAIA 43 Bible Online

ISAIA 43 - njo bible

ISAIA 43

¹Saka tang, Oh Yakob na yanglusang KIBUBA, aser Oh Israel, na kümdaktsüsangi yamai ashir, “Tetsübu, kechiyong ni na alangzük; ni ne tenüng teta aja, na kü meyong lir.

²Tzü ajanga kodang na süia odir, ni ne den alitsü, aser ayongtem ajanga aodang parnoki na memobangtsü; kodang na mi ajanga jajadir, na marongtsü, mesüra milak ne madak mejangrutsü.

³Kechiyong ni KIBUBA ne Tsüngrem, Israel Temeshiba, ne kümzüksang lir; na alang ni Ijip agütsü, Ethiopia aser Seba ne melen agütsür.

⁴Kü tsüngdang na senti aser tetushi ngua aser ni meima ali nung, ni na asoshi nisungtem aser ne taküm asoshi nübur agütsütsü.

⁵Tetsübu, kechiyong ni ne den lir, ni ne metsü anüdoklen nungi bener arutsü aser ne dangi anüolen nungi bendentsü;

⁶anüolentip dang ni ashitsü, ‘Chiokang’ aser anüdoklentip dang meyipa ‘tesot;’ kü jabasotem talang nungi aser alima tatembang nungi kü jalatem bener arung;

⁷kü tenüng agi ajaba nisung shia shiba kü sentsüwangshi asoshi ni yanglua lir; ni pa kümzüktsü, hau, ni pa yanglu.”

⁸“Nükpoker nisungtem, saka tenük aketertem, aser tenarong tajak tenarong aketertem bener arung.

⁹Kintem ajak külemi sentepdakjang, parnok rongnung shibai ya jembizüka ayutsü, aser aji mapang matongdang asenok dang sayutsü akok? Parnok metentsü asoshi sayutsü akok? Parnok metentsü asoshi parnok nem kulitem bener arudakjang; mesüra parnok nungi angashidakjang, aser ‘Ibai shitak’ ta shidakjang.

¹⁰Oda nenoki metettsü aser kü dak amangtsü, aser ni pa-a ta metettsü atema nenok kü kulitem aser ni shimtetba tenzüker lir; kü jakdang kecha Tsüngrem mekümi liasü, mesüra kü sülena malitsü” ta KIBUBAi ashir.

¹¹“Ni, nisa KIBUBA lir; aser kü dak alema kümzüktsüba shinga mali.

¹²Ni jembizük aser ni kümzük, ni metetdaktsü aser nenok rongnung bendanger tsüngrem maliasü; anungji nenok kü kulitem lir aser ni Tsüngrem lir ta KIBUBAi ashir.

¹³Hau, iba anogo nungi ni pa lir; aser kü ket nungi rakzüktsü shinga mali; ni inyaktsü aser aji shibai meyipteptsütet?”

¹⁴Na Alangzükang Israel Temeshiba KIBUBAi yamai ashir, “Nenok atema ni Babiloni yokogo, aser yimti süngkhümji ni raksatsütsü aser Kaldi nungertem pelatepbaji mangyimba kümdaktsütsü

¹⁵Kechiyong ni KIBUBA nenok Temeshiba Israel Yanglusang ni nenok Chuba lir.

¹⁶KIBUBA shibai tzüyim nung taolen aser tzü ajanga lenmang yanglur,

¹⁷shibai talungtsü aser kor temeranger telok aser temeranger külemi anir arur, parnok külemi ontaka alir, parnok meshishitsü; parnok sama-a lir, parnok totzü maliba milen ama remsepa lir.

¹⁸Nenoki taoba mapatem tebilemtet, mesüra akhidang mapa indang teshisadang.

¹⁹Ajiang, ni mapa tasen ka inyaktsü; tanga aji temai adoktsü; aji nai majiteter no? Lisem lima nung lenmang aser takongdak lima nung ayongtem ni yanglutsü;

²⁰arem shirurutem, shirong aser ut, ozütemi ni tushitsü; kechiaser kü nübur aser kü teshimtet pur nem tajemtsü agütsütsü asoshi ni arem nung tzü aser lisem lima nung ayongtem agütsür.

²¹Nisungtemi kü tenüngsang yoktsü asoshi ni parnok atema parnokji ni yanglu.”

²²“Aji saka, Oh Yakob, nai ni yima maru; saka nai ni agi lakteta liasü. Oh Israel.

²³Nai tarongba tenla asoshi kü dangi san bener maru, mesüra ne tetepsetba tenla agi nai ni metushi, ni ne nem chiyungtsü tenla magütsüdaktsü mesüra liangmesen agi lakteta mekümdaktsü.

²⁴Nai kü nem sen agi teronem menemtsü kecha malitsü, mesüra nai ne tenlaba temo agi ni tip metemdaktsü; saka nai ni ne temenentem agi khuret kümdaktsü nai ne tai menaba agi ni aniseta kümdaktsü.

²⁵Shibai pei meyong asoshi ne ozüng raksabatem aidoktsür aji ni lir, aser ne menentem ni mebilemtettsü.

²⁶Asenoki obendangdaki odi, aser ni aijang; aser na metentsüsa ne kulitemji züngdanga shiang.

²⁷Na mezüngbuba tebui temenen mena aser ne o tongdartemi ni anema ozüng raksa.

²⁸Anungji ne temeshidak chuba chirtem ni menentsütsü aser ni Yakob khenyongi teraksatsü ka, aser Israel sensamasaba ka kümdaktsütsü.”