Read njo ISAIA 44 Bible Online

ISAIA 44 - njo bible

ISAIA 44

¹“Ano tang angang, Oh Yakob kü tenzüker; aser ni shimtetba Israel.

²KIBUBA na yanglusang, shibai na nu menden nung kümdaktsü, aser na yaritsü pai yamai ashir, Tetsübu, Oh, Yakob kü tenzüker, aser ni shimtetba, na Yeshurun.[9]

³Kechiyong tzüra-a aliba linük nung tzü, aser ali takong manung ayongtem ni meküploktsütsü; aser chirnur dak kü tanela aser ne dak jakzükbatem dak kü temoatsü meküploktsütsü.

⁴Aser tzüküm anasa willow dong ama parnok ai rongnung poktettsü.

⁵Kati, ‘Ni KIBUBA meyong ta ashitsü’ aser tangar kati pei sasa Yakob tenüng agi ajatsü; kati pei teka nung ‘KIBUBA meyong’ ta zülutsü, aser Israel tenüng jaloka pei sasa ajatsü.”

⁶ KIBUBA Israel chuba, pa alangzüksang Temeranger Telok KIBUBAi yamai ashir, “Ni mezüngbuba, ni tesübuba; aser kü dak alema Tsüngrem mali.

⁷Shiba ni mesüka lir? Pai aji sangdongang, pai aji metetdakjang, aser kü madang aji tokjang. Alemli nungi tarutsü indang shibai metetdaktsü? Ano kechi asütsüar parnok nem shidakjang.

⁸Nenok tetsübu, mesüra tipmetemteti teli! Akhidang ni nenok dang metetdakja mesayu no? Aser nenok kü kulitem lir. Ni alema Tsüngrem lir ma? Hau, Lung mali; ni metet kata mali.

⁹Süngyanglu noksa yanglurtem parnok ajak amajok lir, aser parnok senti osettemi tajangzük magütsütsü; aser parnok maksü ngutettsü asoshi parnoki pei kulitemi mangur mesüra memeteter.

¹⁰Shibai süngyanglu noksa yanglur mesüra kecha tajangzük makaba asoshi temulusaba süngyanglu noksa yanglur?

¹¹Ajiang, par medemer ajak mak asütsü; aser shibaisa iba nung dena lir ajak maksüdaktsütsü; parnok ajak külemi sentepdakjang, parnok noktakdakjang; parnoki tsübutsü, parnok külemi mak asütsü.”

¹²“Yintsüngeri yin kar techira kümdaktsür aser mijang nung inyaker, aser aji yintem agi noksa adokdaktsür, aser aji pa tashi tait tepen agi inyaker. Ajiser pa ayar, aser pa lula-a akümer.

¹³Süng mistri tasadangba lisü iba manung atsülanger, temaitsü agi yanglutsür; aser aji süsür tasadangba agi aji adokdaktsür, aser aji nisung mesüka meimchir sorubangru tobur ajung mesüka aji kidang ataloka ayutsü yanglur.

¹⁴Nisungi cedar süngdong lensüker mesüra hon, mesüra sülemdong bena arur, mesüra nisung asoshi tatsüktsü süng amshitsü KIBUBAi atemba aser tzünglui intetdaktsüba arem nung aliba süngdong kar dak amdaker.

¹⁵Ajiser aji nisung asoshi tatsüktsü asütsü, aser pai aji kar agia pei sasa lemdaktsür; hau, pai aji tsükloker aser amtsük asanger, hau, pai tsüngrem yanglur aser aji külemer; pai aji süngyanglu noksa yanglur, aser iba dang apudaker.

¹⁶Aji tesadang ka pai mi nung atsüker aser iba mi apuba manung pai shi arur; pai tarubaji achir aser temulung asür; ano pai pei sasa mi awanger, aser ashir, ‘Aha! ni lema lir, ni mi nguogo.’

¹⁷Aser tanüngba jagi pai tsüngrem ka yanglur pa süngyanglu tsüngrem pa sasa iba madang apudaker, iba dang sarasadema ashir, ‘Ni kümzükang, kechiyong pa kü tsüngrem lir.’ ”

¹⁸“Parnoki memeteter mesüra parnoki meshisadanger; kechiyong parnoki mangutsü asoshi aser parnoki mangatettsü asoshi pai parnok tenük aser temulungjang shibangtsü.

¹⁹Aser ni aji tesadangka mi nung tsükogo, hau, ano ni iba mijang manung amtsük wangogo; ni shi sangogo aser aji chiogo: aser tanüngba agi ni tesempatsü ka yangludi ma? Süngdong tongben ka dang ni apudakdi ma? ta ashitsü temulungi aittsü, mesüra shisatettsü mesüra angatettsü shinga mali.

²⁰Pai aut chia alir, tekülakoktsüba temulungjangi pa mashileni meyipdaktsü, anungji pai pa sasa kümzüktsü makok, mesüra, ni tiyazü ka nung ameta lir ta nangzüktsü makoker.”

²¹“Itemi bilemtetang, Oh Yakob aser kü tenzüker Israel, ni na kümdaktsü; na kü tenzüker lir, Oh Israel ni na kodanga mamatsü.

²²Ne ozüng raksabatem tzüsü amato, aser ne temenentem mepet amato, ni aidoktsüogo; kü dangi meyipang, kechiyong ni na alangzükogo.

²³Ken tenang Oh nenok anüngtem, kechiyong KIBUBAi aji inyaka lir; washiang, Oh alima telungtem; ken tenmesoang Oh tenemtem; Oh arem, aser iba nung aliba süngdong ajak, kechiyong KIBUBAi Yakob alangzüka lir, aser Israel nung pa sentsüwangshi jungkai adoktsü.”

²⁴Nu menden nung na kümdaktsüba, KIBUBA, na Alangzüksangi yamai ashir, “Ni KIBUBA, ajak yanglusang, shiba kijai anüng ladaka yutsür aser alima sadakjema yutsür.

²⁵ Shibai temezüngeri shinba amajok, aser ainkar o jembirtem yiar ama kümdaktsür; shisa akar nisungtem memeteter kümdaktsür, aser parnok temetetba tamashi kümdaktsür.

²⁶Saka pa tenzüker o akangshidaktsür, aser pa osang abenertemi shinzükba atalokdaktsür. Yirusalem indang, la dak nisung alitsü, aser Yihuda yimtitem indang, parnok yanglutsü, aser parnok teraksatemji ni mesotsü” ta ashir.

²⁷Shibai tarok dang, “Kongadokang” aser ne ayong ajak ni rosepdaktsütsü ta ashir.

²⁸ Shibai Cyrus indang, “Pa kü sannüker, kü ajak pai ataloktsütsü; Yirusalem indang, la yanglutsü nükjidong, aser tenla ki indang, ne kimung yangertsü” ta ashir.