Read njo ISAIA 45 Bible Online

ISAIA 45 - njo bible

ISAIA 45

¹Yamai KIBUBAi pa mezüja shimtetba teka tajichi nung ni ameta aliba Cyrus dang pa madang kintem anizüktsü aser chubatem nangri salatsütsü, aser pa jakdang kishi lapoktsütsü, aser süngkhüm meshibangi alitsü,

²ne jakdang ni aotsü aser keprangkepro tesüsü kümdaktsütsü; ni yongmenyin kishitem anüka raksatsütsü aser merang tartangtsü leptangtsütsü;

³aser ni ne nem tammang dak aliba rongsentem, aser temiimdak mungui aliba rongsen, oda Israel Tsüngrem shibai ne dang ne tenüng agi ajar, ni KIBUBA ta metettsü asoshi agütsütsü.

⁴Kechiyong Yakob kü tenzüker atema aser kü teshimtet Israel, ni ne tenüng agi na jaogo; nai ni memetetaka ni na jaogo.

⁵Ni KIBUBA lir, aser ano shinga mali; kü dak alema tangar Tsüngrem mali, nai ni memeteti liaka ni na nangri kangtsü.

⁶Oda anüdoklen nungi aser anüolen nungi oda kü dak alema shinga mali ta parnoki metettsü asoshi; ni KIBUBA lir, aser ano tangar shinga mali.

⁷Ni tesangwa kümtsür aser tammang adokdaktsür, ni tesünep yanglur aser tamajung adokdaktsür; ya ajak inyakba KIBUBAji ni lir.

⁸Oh anüngtem, temalen nungi tzünglu meküpzüka yokang, aser mepettemi temeshiba oshizüka yokang, tekümtet nung tejang atangtsü alimai lapokdakjang, aser pai temeshiba külemi adoktsütsüsa kümdakjang; ni KIBUBAi ya yanglu.

⁹ Shibai pei Teyanglusang den aser chipoi poteper den tokteper aiatai! Poteper dang ajongli-i, “Nai kechi yanglur?” ta mesüra ne mapai, “Pa teka maket ta ashir asü?”

¹⁰Shibai tebu ka dang “Nai kechi yamai yanglu?” ta mesüra tetsür ka dang, “Kechi agi na nusotsü kangshir?” ta shidir, aiatai!

¹¹Yamai KIBUBA, Israel Temeshiba pa Teyanglusangi ashir; “Tarutsü mapatem indang kü dang kü chirtem indang asüngdangdi ma aser kü ket agi inyakba mapatem indang nenoki kü nem ozüng agütsüdi ma?

¹²Ni alima yanglu, aser iba manung nisung yanglu; ni kü teka agi anüngtem songladaktsü, aser item telok ajak ni tareni yutsü.

¹³Ni pa temeshiba nung Cyrus sakdaktsü, aser ni pa lenmang ajak temetong kümdaktsütsü; pai kü yimti yanglutsü, aser kü aenersa aliba tia nüji tia nung yutsütsü, jenjang asoshi mesüra tajangzük angutsü atema masü ta Temeranger Telok KIBUBAi ashir.”

¹⁴Yamai KIBUBAi ashir, “Ijip nung mapa inyakertem aser Ethiopia nung shishirtem, aser Sebea nunger aso tajungtem ne dangi arutsü, aser parnok ne sülen aotsü; yinzü agi sentaker parnoki arutsü; parnoki ne dang apudaka ne dang mepishitsü, Atangji Tsüngrem ne dak lir, aser tangar ano shinga mali, tangar Tsüngrem mali.

¹⁵Atangji na ne sasa atsüka aliba Tsüngrem Oh, Israel Tsüngrem, Tekümzüksang.

¹⁶Parnok mak asütsü, atangji parnok ajak süngmangteptsü; parnok süngyanglu yanglur ajak külemi rongrongteptsü.

¹⁷Saka Israelbo KIBUBAi teti tatem maka tekümtet agi kümzüka alitsü; nenokbo teti tatem maka mak mesüdaktsütsü mesüra süngmangtepa malitsü.”

¹⁸Kechiyong anüngtem yangluba KIBUBAi yamai ashir, “Pa Tsüngrem lir, alima poktetdaktsüba aser aji yanglusang; pai aji tentet, pai aji amajok nung meyanglu, pai aji nisung lidaktsütsüba kümdaktsü; ni KIBUBA lir; aser tangar shinga mali.

¹⁹Ni temiimdak ammang aliba lima ka nung aji mejembi, ni Yakob chirnur dang, amajok nung ni bushiang, ta mashi. Ni KIBUBAi kechi shitak aji jembir, aser kechi ochi aji ashir.”

²⁰Nenok sasa sentepang aser arung; anasa külemi arung, nenok anüngzüka aliba kintem! Süngi chitetba süngyanglu abenertem parnok temetetba shisatsü mali, aser kümzüktsü makokba tsüngrem dang sarasademer.

²¹Parnok dang külemi shisadangdakjang, ajiser asenok dang parnoki sayudakjang, aser iba kuli bener arudakjang! Shibai akhidang ya metetdaktsü, aser alemli ibai jembizüka toktsü? Aji ni KIBUBA masü no? Tangar Tsüngrem ka masü, niang temeshi aser kümzüktsüba Tsüngrem, kü dak alaka shinga mali.

²²Kü dak reprangang aser nenok kümzüka liang, alima tatembang ajak; kechiyong ni Tsüngrem lir, aser ano tangar shinga mali.

²³ Kü mesüngi azüngashir, kü bang nungi ochiba adokogo, aser aji lepa marutsü oda kü dang temokok ajaki apudaktsü, temeli ajaki azüngashitsü.

²⁴KIBUBA dak dang ochiba aser tashi lir, pa dangisa nisungtem arur, aser pa anema ain adokertem mak asütsü.

²⁵KIBUBA nung Israel chir ajak metentsü, aser sentsüwangshitsü.