Read njo ISAIA 46 Bible Online

ISAIA 46 - njo bible

ISAIA 46

¹Bel-i mechioka alur, Nebo angüma alur; parnok süngyanglu shirurutem nem nungloktsügo. Nenoki bener senzübatem aniseta aliba kiset shiruru dak khu amato itemji benloktsüogo.

²Parnok angüma alur, parnok külemi mechioka alir; parnoki khuji agizüktsü makok, saka parnok sasa tepuokdaki aor.

³Kü dang angang, Oh Yakob kidong, aser anünga aliba Israel kidong ajak, shirnok ni tepok nung apung, aser nu menden nungi aben.

⁴Aser oda asatao tonga ni ano kasa lir, nenok kupu mapu tashi ni nenok abentsü; ni yangluogo aser ni apungtsü, ni abentsü, aser ni kümzüktsü.

⁵Shiba den nenoki ni mesüktepa kümdaktsütsü aser shiba den ni kasa kümdaktsütsü, aser kati ka den mesükteptsü shiba den nenoki ni medemdangdaktsütsü?

⁶Shirnoki juli nung hon tokzüker aser taribi ozüker, parnoki hon atsünger aser pai tsüngrem ka tsüngtsür, aser iba jakdangji apudaker, aser aji külemer.

⁷Parnoki aji tapu nung apuloker bener aor, aser pa talidak yutsür, aser pa talidak nungi marakzüi alir. Kati pa dang ayima jashiaka pai melangzütsü, mesüra pa timtem nungi pa mekümzüktsü.

⁸Ibai bilemtetang, iba indang shisadangang, tanaben aji temulungjangi aitdakjang. Oh nenok ozüng raksartem.

⁹Alemli mapatem bilemtetang; kechiyong ni Tsüngrem aser tangar shinga mali; ni Tsüngrem aser ni ama tangar shinga mali;

¹⁰shibai tetenzük nungi tatembang tashi aser alemli mapang nungi ano meinyaki aliba indang ashir; shibai kü sentong ataloktsü, aser kü tsüngdang ajungba ajak ni inyaktsü ta ashir;

¹¹anüdoklen nungi tesaksak ozü ka aser kü sentong asoshi alinük talang nungi nisungji ajar; hau ni jembiogo, ni ano aji ataloktsütsü; ni mulungtetogo, ni ano aji inyaktsü.

¹²Kü dang angang, ochi nungi talangka pila-a aliba nenok temulungjang temerang alirtem.

¹³Ni kü ochiba anasa bener arur, aji talangka malitsü, aser kü tekümtet memenutsü; aser ni Zion nung Israel kü sentsüwangshi asoshi tekümtet yutsütsü.