Read njo ISAIA 47 Bible Online

ISAIA 47 - njo bible

ISAIA 47

¹ Alung, aser aut nung menang, Oh tasüngtet Babilon jala; chuba menden ka makai ali nung menang, Kaldi jalatem; kechiyong joko ne dang anebaneber aser anükanüker ta majatsü.

²Temenüngba lung agiang, aser chiyungtsü menüngang; ne temeiba sü agizükang, ne sü talang agizükang, aser tetsüng tenembang, ayongtem ajanga süiang.

³Na mangsa aliba menembangtsü, hau maksütsü angutsü; ni mang ayangtsü, ni nisung shinga mapayutsü.

⁴Asen alangzüksang, pa tenüng Temeranger telok KIBUBA, Israel Temeshisang lir.

⁵Na ola madoki liang, aser tammangdaki iang, O Kaldi jalatem, kechiyong joko na, Yimlitem madak KIBUBA ta majatsü.

⁶Ni kü nübur den ain adoka liasü, ni kü senmang menentsüogo, aser itemji ne ket nung agütsüogo; nai parnok dang yimlibilem mesayu; tambur tasa nem nai ne süngra kanga reta benloktsüogo.

⁷Aser nai ashi, “Ni teti tamarentsür ka alitsü; aji asünung nai item mapa ne mulungjang nung rizünga mayu, mesüra iba tatembang kechi asütsüar mebilemdang.”

⁸ Anungji tang ya angang, na benjongbentsü meimsang mekümdangi alisang, aser ne mulungjang nung, “Ni lir, kü dak alaka shinga mali, ni amitsürsa mena malitsü, mesüra techirtem samaba ni memetettsü ta ashisang.

⁹Saka kenü yongi dang techirtem samaba aser amia aliba anaprongla ne dang arutsü, ne temezünger jenti aser ne atakatem o tulu jenti liaka, itemji peria sünga ne dangi arutsü.”

¹⁰Kechiyong ne tamajung tasa nung nai temulung alem, nai ashi, “Shingai ni mangur” ne shisatsü aser ne temetetba agi na mashileni ani; aser nai ne mulungjang nung ashi, “Ni lir, aser ni alaka ano shinga mali.”

¹¹Anungji ne dak tamajung agi atongtsü, nai aji endoktsütsü ain kecha memetettsü; aser tesamatsü agi ne dak atongtsü; nai aji endoktsü makoktsü aser ajongbena nai memetetba teraksatsüba agi ne dak atongtsü.

¹²Tang na ne arasentsür atakatem mapa, aser temezünger telok den na lanuwa nungi inyaka aruba den noktakang; ashiko nai takok angutsü akok, ashiko nai tetsübutsü inyaktsü akok.

¹³Ne teshisadanger jenti agi na aniseta lir, shirnoki anüng lemsatsür, aser petinu dak reprangertem aser ne dang ita tasen shia tia ashirtem, parnok noktaka na kümzükdakjang.

¹⁴Ajiang, parnok mo tembang ama alitsü, mi agi parnok arongtsü; milak ain nungi parnok sasa mekümzüktsü, aji lemdakja awangtsüba mijang ka masütsü, mesüra anasa amentsü mi ka masütsü.

¹⁵Kechi nung nai meranga inyak iba amai na asoshi alitsü, shirnoki ne den na lanuwa nungi shishilemba asü, nisung shia pei lenmang nung nemzütsü; na kümzüktsü shinga malitsü.