Read njo ISAIA 48 Bible Online

ISAIA 48 - njo bible

ISAIA 48

¹Angang, Oh Yakob kidong, Israel tenüng agi ajaba, aser Yihuda tzü nungi adoka aliba; KIBUBA tenüng nung azüngashiba, aser Israel Tsüngrem tetshir, saka ochi agi mesüra temeshiba agi masü, ya nenoki angang.

²Kechiyong parnoki pei sasa temeshi yimti tenüng agi ajar, aser parnok sasa Israel Tsüngrem dak metaloka alir; Temeranger Telok KIBUBA aji pa tenüng lir.

³Taoba mapatem indang ni akhidang nungi metetdaktsü; hau, itemji kü bang nungi adok, aser ni parnok dang sayu; aoksa-a ni itemji inyak aser itemji atalok.

⁴Kechiaser na temulung temerang, aser ne tenütsü yongmenyin ta ni metet.

⁵Anungji ni akhidang nungi ne dang metetdaktsü, kü süngyanglui itemji inyak, kü süng agi ajiba aser molutetba süngyanglui parnok dang mela, ta nai shia lir ta aji ataloka marudang ni ne dang sayu.

⁶Aji nai angashi, ya ajak atalokba ajiang, nenoki iba indang kuli mesüli ma? Iba mapang nungi oda miima aliba nai memeteti aliba, ne dang mapa tasen sayuogo.

⁷Parnok tang yangluba lir, akhidang nungi masü, ajiang, ni itemji meteta nai shia lir ta iba anogo matong tashibo nai memeteti liasü.

⁸Nai tangashia mangshi, temeteta memeteti liasü, akhidang nungi ne narong melapoki liasü; kechiaser nai kanga külakkübonga benshi aser nu menden nungi ozüng raksar ta ja-a liasü ta ni metet.

⁹Kü nüng atema kü ain adokba titema alitsü, aser kü nüngsang asoshi ni na meleptoktsü, ni na asoshi sota lir.

¹⁰Ajiang ni na merüktettsüogo, saka taribi ama masü timtem tekangshi mimung nungi ni na shimteta lir.

¹¹Kü atema, kü atema, ni aji inyaktsü; kechiyong kodaser kü tenüng menentsütsü? Kü sentsüwangshi ni tangar nem magütsütsü.

¹² Kü dang angang Oh Yakob, aser jatetba Israel, Ni KIBUBA lir, Ni mezüngbuba, Ni ano tesübuba lir.

¹³Hau, kü ket agi alima kimung yanger aser kü teka tajichi agi anüngtem songladaktsü, ni parnok dang kodang jadir, parnok külemi noktaker.

¹⁴Nenok sasa sentepang, nenok ajak, aser angang, nenok rongnung shibai itemi metetdaktsü? KIBUBAi pa meim, Babilon dak pai pa aginüba inyaktsü, aser pa tepen Kaldi nunger madak alitsü.

¹⁵Ni, oda Ni, jembiogo; hau, ni pa aja: ni pa bener aru, aser pai pei lenmang azükarutsütsü.

¹⁶Nenok ni anasai arung, nenoki ibai angang, tetenzük nungi ni miima mejembi; iba atalokba mapang nung ni lir, aser tang KIBUBA Tsüngremi ni aser pa tanela yok.

¹⁷Yamai KIBUBA, ne Alangzüksang, Israel Temeshibai ashir, “Ni KIBUBA nenok Tsüngrem lir, shibai nenok dang tajangzük asoshi sayur, aser nenok aotsüba lenmangi nenok anir aor.

¹⁸Nenoki dang kü ozüngtem anga asübo, idangji ne tesünep ayong ka amai lila, aser ne temeshiba tzüyim tzüsem ama lila;

¹⁹ano ne metsü lisem ama aser ne chirnur metsüjang ama lila; kü madang nungi pa tenüng meleptoki mesüra mesamatsüi lila.”

²⁰ Babilon nungi oang, Kaldi nunger nungi jenang; ken atenba ola agi nenoki metetdakjang, ya shiang, alima tatem tonga shiang, nenoki shiang, “KIBUBAi pei tenzüker Yakob alangzükogo.”

²¹Aser lisem lima ajanga pai parnok anir aodang parnok metzürai ali; lung nungi parnok asoshi pai tzü yimdaktsü, pai lung pokmadaktsü, aser tzü moteta adok.

²² Tamajunger asoshi tesünep mali, ta KIBUBAi ashir.