Read njo ISAIA 49 Bible Online

ISAIA 49 - njo bible

ISAIA 49

¹Kü dang angang, Oh tzüyimküm angang, nenok talang nung alirtem, KIBUBAi nu menden nungi ni aja, kütsü nu menden nungi pai kü tenüng aja.

²Pai kü bang nok techira ama yanglutsü, pa kabu akhümpok nung pai ni atsükokdaktsü; aser pai ni temeyutetba lijakjang kümdaktsü, aser pa lijak pung nung pai ni nembanga ayu.

³Pai kü dang ashi, “Na kü tenzüker lir, Israel ajanga ni sentsüwangshitsü.”

⁴Saka ni ashi, “Ni amajok nung inyaka belem, ni kü tashi tazüngla aser amajok nung endokogo, aji saka kü obendangba KIBUBA den lir, aser kü tajangzük kü Tsüngrem den lir.”

⁵Tang KIBUBA shibai nu menden nungi pa tenzüker asütsü ni yanglu, pai Yakob pei dangi meyipa bener arutsü, aser Israel pei dangi anitentsü ta ashir, kechiaser ni KIBUBA nükdang tetushi ngua lir aser kü Tsüngrem kü tashi küma lir,

⁶ hau, pai ashir, “Yakob kidongtem adokdaktsütsü, aser anünga aliba Israel tanaben yanglushitsü, ya na asoshi onsara tepungba lir; anungji kü tekümtet alima tatembang tongtettsü asoshi ni na kintem tesangwa kümdaktsütsü.”

⁷Israel alangzüksang na, aser Pa Temeshisang KIBUBAi nisungi sensatsüba dang, aser kintemi sempaba dang, yimsüsürtem tenzüker dang yamai ashir, “Chubatemi angutsü aser noktaktsü tamarenertem, aser parnoki apudaktsü; kechiaser KIBUBA shiba tamang katetba Israel Temeshisang lir pai na shimtet.”

⁸ Yamai KIBUBAi ashir, “Tagizüktettsüba mapang nung ni ne dang langzüogo, aser tekümtettsüba anogo nung ni na yariogo; aser ni na wazüka ayutsü aser nüburtem den tezüngzüktepba asoshi ni na agütsütsü, tanaben alima yanglushitsü aser sentoka aliba senmang nung parnok lidaktsütsü asoshi;

⁹tepuokertem dang, ‘Adokadokang,’ aser ammang nung alirtem dang, ‘Nenok sasa sayuang,’ ta parnok dang jembia ashi. Parnok lenmang nung chiyimtsü aser tenem kolak moapu ajakji parnok chiyimdak alitsü.

¹⁰ Parnok mayatsü mesüra metzüratsü; ano tatsük mesüra anüpu agi parnok metepsettsü; kechiyong parnok dak yimlibilem akasangi parnok anitsü, oda tzü ayongtem anasa pai parnok anüktsü.

¹¹Aser kü tenem ajak lenmang ka kümdaktsütsü, aser kü lentongbang uludaktsütsü.

¹²Ajiang, itemi talang nungi arutsü, aser ajiang, itemi anüolentip nungi aser anüolen nungi; aser itemi Sinim lima nungi.

¹³Ken tenang, Oh anüngtem; aser pelashishia liang, Oh alima, aser ola adoka ken tenang, Oh tenemtem, kechiyong KIBUBAi pei nübur süneptsür, aser par timtem toushi madak temulung aria bilema alitsü.”

¹⁴Saka Zioni ashi, “KIBUBAi ni senzüka yutsü aser KIBUBAi ni amadoka lir.”

¹⁵Tetsüri pei nu menden nungi anguba tanur dang aria mebilemtsüsa pei mamayongba tanur amadokdi ma? Itemi amadokaka, aji saka nibo na mamatsü.

¹⁶Ajiang, kü kabu nung ni na ajenloka lir; ne jaratem maneni kü den lir.

¹⁷Na yanglutsü nisungtemi ilungdaki, na samatsürtem aser na raksatsürtem na nungi atsüngzüktsü.

¹⁸Meketa ne tenük akasoang, aser ajiang, ya ajak parnok sasa külemi senteper, aser ne dangi arur. Ni ali tashi KIBUBAi ashir, item ajak sobusolemtsü amato sobuang, aser kiyimla amato ne sasa item agi nangri kangang.

¹⁹Ne teindokba aser azüngmeyakdak linük aser ne teraksa linük asoshiji atangji tangbo nübur asoshi kanga temesü alitsü, aser na meyokertemji talang nung oagi alitsü.

²⁰Na aenersa aliba tia nung asoba chirtemi ano ne narong nung ashitsü, “Ni asoshi talidak onsara temesü lir, ni alitsü kü nem talidak kua.”

²¹Idangji nai ne mulungjang nung ashitsü, “Item chirnur shibai kü nem sotsü? Ni tanur mali aser tapung aenersa yok aser nemzüa lir; shibai itemi ni asoshi mesütet? Ajiang, ni kija tokja liasü; itemi kong nungi?”

²²Yamai KIBUBA Tsüngremi ashir, “Ajiang, ni kü teka kintem dangi mekangtsü, aser nisungtem dang kü temaitsü ajungkettsütsü; aser parnoki ne jabasotem teku nung ajunger arutsü, aser ne jalatem parnok tapubang nung abentsü.

²³Aser chubatem na anükba tebutem asütsü, aser chubatsürtem na anebalua yariba tetsütem alitsü, parnoki pei tejak alilen shia ne dang apudaktsü, aser ne tetsüng auyi menaktsü, nai ni KIBUBA ta metettsü aser shirnoki ni asoshi ata-a lidir mak masütsü.”

²⁴Temeranger nungi tetepsettsü aliba rakzüka otetdi ma, mesüra tashiyim agi tepuokertemji kümzüktetdi ma?

²⁵Saka KIBUBAi yamai ashir, “Tashi tulur meyong tepuokertema bener aotsü aser tesashi nisung nungi tetepsettsü aliba anizüktsü; kechiyong na anemer den ni anemtsü, aser ne chirtem ni kümzüktsü.

²⁶Na kangshirtem nem ni parnok shi chidaktsütsü, aser parnok pei zü agi yi tasen agi ama parnok mesepdaktsütsü, aser shi ajaki ni KIBUBA na tekümzüksang aser na alangzükba Yakober Tashi Tulusang ta metettsü.”