Read njo ISAIA 50 Bible Online

ISAIA 50 - njo bible

ISAIA 50

¹KIBUBAi yamai ashir, “Netsü tepalatsü kaket koba agi ni la endok aji kong ali? Mesüra, ne sentsü tsüa aliba shiba dang ni nenok ayok? Ajiang, nenok tai menabayong nenok ayok, aser nenok ozüng raksaba asoshi netsü endok.

²Ajangla, ni arudang nisung shinga mali asü no? Nenok alangzüktsü kü teka onsara tatsü asü? Mesüra nenok kümzüktsü ni ain mali asü? Ajiang ni arütsü dang ni tzüyim kongdaktsür, ni ayongtem lisem lima kümdaktsür; item ango tzü malibayong teshinem menemer, kechiaser tzü mali, aser tetsüra agi asür.

³Ni anüngtem tanak agi sobudaktsür, aser parnok abentsü anemsü yanglur.”

⁴Aniseta alir dang o agi ni mapang yangpong nung koda jembitsü aji metettsü asoshi KIBUBA Tsüngremi kü nem tesayutsü asoshi temeli agüja lir; anepdang shia pai sakdaktsür, nütsüngtemi inyakba ama pai kü narong saksalemdaktsür.

⁵KIBUBA Tsüngremi kü narong lapokja lir, aser ni tashi mangai mali asü, mesüra ni tesülen memeyip.

⁶ Ni kü terongdong tazüker dangi tendak, aser apeter dangi kü tenibung tendak; ni kü tejak maksü aser metsü metsüloktsüba nungi atsüka mali.

⁷Kechiyong KIBUBA Tsüngremi ni yaritsü; anungji ni mesüngmangi lir; anungji ni kü tejak lung techira ama ayur, aser ni mak masütsü ta ni metet.

⁸ Shibai ni metentsür, pa ni anasa lir; kü den shibai tokteptsü? Asenok külemi noktakdi! Kü tsükchir shiba? Pa ni anasa arudakjang.

⁹Ajiang, KIBUBA Tsüngremi ni yaritsü, shibai ni aitsütsü? Ajiang, parnok süoshi ama ajentsü, tarütsü agi parnok chiadoktsü.

¹⁰Nenok rongnung shibai KIBUBA tsübur, aser pa tenzüker ola angar? Shiba ammang nung jajar aser tesangwa mali, pai KIBUBA tenüng nung temulung lemdakjang aser pa Tsüngrem dak imla-a lidakjang.

¹¹Ajiang, nenok ajak mi tsüklokertem aser nenok sasa milungsang nung nenok jajang. Kü ket nungi nenoki ibai angutsü, nenok tejashi nung ontaka alitsü.