Read njo ISAIA 51 Bible Online

ISAIA 51 - njo bible

ISAIA 51

¹Kü dang angang, nenok temeshiba sülen anidaker, nenok KIBUBA bushirtem: nenok lung koba nungi angentet, aser nenok kangla tapok koba nungi tutet, aji ajiang.

²Nenok tebu Abraham dang aser nenok asoba Sarah dang reprangang. Abraham kija dang ni aja, aser ni pa moatsü, aser pa nungi soyapokyadaktsü.

³Kechiyong KIBUBAi Zion sünepdaktsütsü; endoka aliba linük ajak pai sünepdaktsü, aser par arem Eden ama, aser par lisem lima KIBUBA tsüki ama kümdaktsü; tepelatsü aser tepela tenüngsang agütsüba, aser ken atenba ola pa dak angutsü.

⁴Kü nüburtem tenoktenoka angang; kü kintem, kü dang tenarong tenjang, kechiyong kü dak nungi tesayuba ka aotsü, aser ochiba nisungtem tesangwa asoshi yutsütsü.

⁵Kü temeshiba ana nung lir, kü tekümtet o agi aser kü ket agi nisungtem o bendangtsü; tzüküm limatemi ni asoshi ata-a alitsü, aser kü ket nung parnoki temulung alemtsü.

⁶Ne tenük anünglen ranglokang, aser alima teküboklen reprangang; kechiyong anüngtem mokozü ama sama-a aotsü, aser alima süoshi ama tejen akümtsü, aser shirnok yangi alir, manga ama asütsü; saka kü tekümtet teti alitsü, aser kü temeshiba kodanga meraksatsü.

⁷Kü dang angang, nenok kü temeshiba meteter, nenok kü ozüng temulungjang nung ayurtem; nenoki nisungi arütsüba tetsübu; mesüra parnoki sensamasatsüba nung tesüngmang.

⁸Kechiyong tarütsüi süoshi achiba ama parnok achitsü; aser meseni tezüng achiba ama parnok achitsü, saka kü temeshiba teti alitsü, aser kü tekümtet putu ajak dang alitsü.

⁹Sakang, sakang, tashi itshiang, Oh KIBUBA tepen; alemli anogo nung ama, akhi mapang pututem ama sakang! Nai Rahab[10] anüka melepsatsüka ma? ngüm molutzürang ateta matsüng ama?

¹⁰Nai tzü tarok tzüyim takong mekümdaktsüka ma; nai tekümzükba pur asoshi tzüyim tarokji lenmang ka mekümdaktsüka ma?

¹¹Aser KIBUBAi alangzükba meyipa arutsü, aser ken tena Zioni arutsü; aser teti tatem maka tepela parnok kolak nung alitsü; parnok tepela aser pelashishia alitsü angutsü, aser tejashi aser temulung atemba jena oadoktsü.

¹²Ni nenok süneptsübaji lir; süadoktsüba nisung aser nisung chir shiba ai ama akümtsü lir, aji tsübua alitsüba na ya shiba?

¹³KIBUBA na Teyanglusang shibai anüngtem songlatsü, aser alima kimung azüngdaktsü, nai kechiba amadoker, aser rishikangshiri na samatsüdi asüdang pa mit adokba nai maneni tsübua ali? Rishikangshir mit kong ali?

¹⁴Yakta aen lima tepuokertem nüji kümdaktsütsü, pa kanglai tasütsü lungoka maitsü mesüra pa chiyungtsü agi manüngtsü.

¹⁵Kechiyong tzüyim arimesoa tzüsem arütsüsangji ni; KIBUBA lir pa tenüng Temeranger Telok KIBUBA lir.

¹⁶Aser ni kü otem ne bang nung enoktsüogo, aser kodang ni anüngtem songladaktsü aser alima kimung azüng, ni na kü kabu akhümpok nung atsükokdaktsü, aser Zion dang ashi, “Na kü nübur lir.”

¹⁷ Sakang, sakang, Oh Yirusalem, kobai KIBUBA teka nung pa mit adokba marok ajem; nai temesepba marok jemogo, aser aji agiogo.

¹⁸Lai asoba jabaso ajak rongnung la anüktsü shinga mali; mesüra pa mesütetba jabaso ajak ket agi agitsü shinga mali.

¹⁹Item mapa ana ne dak atalokogo, ne den shibai aria bilemtsü? Teraksa aser tesama, ayawara aser nok, ni koda na sünepdaktsütsü?

²⁰Ne jabasotem lulaogo, parnok sang nung apuba shio ama, parnok yimdong ajak nung tezülen ontaka lir; parnok KIBUBA mit ne Tsüngrem tarütsüba agi sünga lir.

²¹Anungji tang ibai angang, na timtem tekangshiba, aser temesepba nisung, saka yi agi masü.

²²Yamai KIBUBA, ne KIBUBA, pai kü indang mepishisangi ashir, “Ajiang, ni ne ket nungi temesepba marok oda kü mit adokba ausu agiogo; nai joko ya tanaben majemtsü;

²³aser shirnoki na rishikangshi parnok ket nung ni aji yutsütsü, shirnoki ne dang, onok süia odi apudakang; aser ne terongdong alima ama nisung süitsü yimdong ama kümdaktsü,” ta ashi.