Read njo ISAIA 52 Bible Online

ISAIA 52 - njo bible

ISAIA 52

¹ Sakang, sakang, ne tashi itshiang, Oh Zion, ne tobur tajung süoshi abenang, Oh Yirusalem temeshi yimti, kechiyong tang nungi ne dangi memejeptokba aser memerükba maitsü.

² Ne sasa auyi temtokang, shishiang, Oh puoka aliba Yirusalem, ne sasa nekong nung sentakba lisü sala-ang, Oh tepuokba Zion jala.

³Kechiyong KIBUBAi yamai ashir, “Nenok jenjang makai ayok; aser nenok sen medeni alangzüktsü.”

⁴Kechiyong KIBUBA Tsüngremi yamai ashir, “Kü nübur tamasa Ijip nung aenersa alitsü alu, aser Asiria nungeri kecha masü nung parnok rishikangshi.

⁵Saka, tang ni yangi kechi angur” ta KIBUBAi ashir? “Oda kü nüburtem kecha masü nung pur ogo, aser parnok yimsüsürtemi parnok dak metenoktsür” ta KIBUBAi ashir, “aser anogo tepiyong kü tenüng sensatsür.

⁶Anungji kü nüburi kü nüng metettsü; anungji iba anogo nung o jembisangji nia ta parnoki metettsü, ajiang ni yangi lir.”

⁷ Shibai osang tajung bener arur, tesünep metetdaktsür, tajung indang osangtajung bener arur tekümtet sangoktsür, shibai Zion dang, “Ne Tsüngremi chubar” ta ashir, tenem nung pa tetsüng koda tobur tajung lir!

⁸Angang ne mitkar ola, parnoki ola adoker, külemi parnoki ken atener; kechiyong kodang KIBUBA Zioni meyipa arudir, parnoki tenük o tenük na chitepa angutsü.

⁹Pelasetang, külemi ken tenang, Yirusalem nung nenok jentoka aliba linüktem, kechiyong KIBUBAi pei nübur sünepdaktsü, pai Yirusalem alangzüka lir.

¹⁰Kin ajak nükdang KIBUBAi pa temeshi tepen tasa kümdaktsü; aser alima tatembang ajaki asen Tsüngrem tekümtet angutsü.

¹¹ Nenok pila-ang, pila-ang, yang nungi oadokang, memerükba oset kecha dak tekongshi! Pa madang nungi nenok oadokang; nenok merüka liang, nenok KIBUBAr po abenertem.

¹²Kechiyong nenok ilunga maotsü mesüra nenok jena maotsü, kechiyong nenok dang tama KIBUBA aotsü; aser Israel Tsüngrem nenok sülen alitsü.

¹³Ajiang, kü tenzüker azükarutsü, pa ulutsütsü, aser ajungkettsü aser kanga temaba asütsü.

¹⁴Aikati pa ngua süngmangba ama pa tereprangtsü tangar nisung dak alaka, aser pa sorubangru nisung chirtem memesüki raksa-a liasü.

¹⁵ Yamaji pai kin aika aoksatsütsü; chubatemi pa madang parnok tebang shibangadoktsü; kechiyong parnok dang mashiba parnoki angutsü, aser koba parnoki mangashi, iba indang parnoki shisadangtsü.